ریاض : سعودی عرب سوڈان کی معاشی ترقی اور خوش حالی کے لیے امداد دینے والے ممالک میں سرفہرست ہے۔
تفصیلات کے مطابق سعودی عرب کے شاہی دیوان کے مشیر اور شاہ سلمان سینٹر فار ریلیف اینڈ ہیومینیٹری ایکشن کے جنرل سپروائزر ڈاکٹر عبد اللہ بن عبد العزیز الربیعہ نے اس بات پر زور دیا کہ سعودی عرب اور برادر ملک سوڈان کے مابین مضبوط تاریخی روابط اس بات کا ثبوت ہیں کہ سعودی عرب سوڈان اور اس کے عوام کی حمایت ومدد کو ایک اولین ترجیح دیتا ہے۔
سعودی عرب نے ماضی میں بھی سوڈان کی بڑھ چڑھ کر مالی مدد کی اور سال 2019ءکے آخر تک مملکت کی طرف سے سوڈان کو ایک ارب 20 کروڑ ڈالر کی امداد دی گئی تھی، یوں سعودی عرب سوڈان کو مالی امداد دینے والے ممالک میں سر فہرست ہے۔
انہوں نے کہا کہ سعودی عرب برطانیہ اور سویڈن کی طرف سے سوڈان کی امداد سے متعلق کوششوں کو سراہتا ہے۔
ڈاکٹر الربیعہ کا کہنا کہ ان کا ملک سوڈان کے عوام کو درپیش معاشی ، انسانی ماحولیاتی اور صحت سے متعلق چیلنجوں سے آگاہ ہے۔
اپریل 2019 میں سعودی عرب نے متحدہ عرب امارات کے ساتھ مل کر سوڈان کو تین ارب ڈالر کی مدد فراہم کی، اس میں 50 کروڑ ڈالر کی رقم سوڈان کے مرکزی بنک میں رکھی گئی تاکہ سوڈان کی کرنسی کو استحکام فراہم کیا جا سکے۔
انہوں نے بتایا کہ شاہ سلمان ریلیف سینٹر نے 2020 کے منصوبے میں سوڈان میں بہت سی مہمات جن میں دو طبی مہمات شامل ہیں کا پروگرام تیار کیا ہے۔
میڈیا رپورٹس کے مطابق ان مہمات میں نابینا پن کی روک تھام اور مختلف امراض نمٹنے کے لیے دو میڈیکل مہمات شامل ہیں، سوڈان میں سعودی عرب کے تعاون سے ہونے والے طبی پروگرام کے لیے 15 لاکھ ڈالر کی رقم مختص کی گئی ہے۔
