اسلام آباد: فیڈرل انویسٹی گیشن ایجنسی (ایف آئی اے) نے پاکستان مسلم لیگ ن کے دو رہنماؤں شاہد خاقان عباسی اور خرم دستگیر کو تحقیقیات کے لیے کل طلب کرلیا۔
شوگر انکوائری کمیشن کی جانب سے لکھے گئے خط میں سابق وزیر اعظم اور سابق وزیر صنعت و تجارت کو حکم دیا گیا ہے کہ وہ کل ساڑھے تین بجے تک ایف آئی اے کے دفتر میں پیش ہوں۔
خط میں دونوں کو حکم دیا گیا ہے کہ وہ متعلقہ دستاویزات کمیشن کے سامنے پیش کریں اور تحقیقاتی ٹیم کی معاونت بھی کریں۔
مزید پڑھیں: چوہدری شوگر مل میں شریف خاندان کی کرپشن کی غضب کہانی منکشف
واضح رہے کہ شاہد خاقان عباسی نے دو روز قبل چینی انکوائری کمیشن کے سربراہ واجد ضیا کو خط لکھا تھا اور کہا تھا کہ وہ ٹیم کے سامنے پیش ہوکر اہم معلومات فراہم کرنا چاہتے ہیں۔
انہوں نے لکھا کہ تھا کہ میں ایسے تمام ثبوت و شواہد ایف آئی اے کے حوالے پیش کروں گا جس کے بعد چینی مافیا کے خلاف کارروائی کرنے میں آسانی رہے گی۔ یاد رہے کہ شوگر کمیشن جس نے 25 اپریل کو اپنا کام مکمل کرکے وزیراعظم عمران خان کو رپورٹ پیش کرنا تھی، اس نے وفاقی حکومت سے 3 ہفتے کی مہلت مانگی تھی۔
یہ بھی پڑھیں: چینی بحران پر انکوائری کمیشن کو مزید 3ہفتے کا وقت دینے کی منظوری
وزیراعظم عمران خان نے 25 اپریل انکوائری کمیٹی کی رپورٹ منظر عام پر لانے اور ملوث عناصر کے خلاف کارروائی کرنے کا اعلان کیا تھا۔
