کابل: افغان دارالحکومت کابل کے ایئرپورٹ پر زوردار دھماکا ہوا ہے، پینٹاگون نے بھی دھماکے کی تصدیق کردی ہے۔
افغان میڈیا کے مطابق کابل ایئرپورٹ کے مشرقی دروازے پر پر زوردار دھماکا ہوا ہے، دھماکے کے نتیجے میں تیرہ افراد ہلاک جبکہ متعدد زخمی ہوئے ہیں،ہلاک ہونے والوں میں بچے بھی شامل ہیں۔
خبرایجنسی کے مطابق زخمیوں میں طالبان کے سیکیورٹی اہلکار بھی شامل ہیں۔
ترجمان پینٹاگون جان کربی نے بھی کابل ایئرپورٹ پر دھماکے کی تصدیق کرتے ہوئے کہا کہ نقصان کا فوری طور پر علم نہیں ،تفصیلات اکٹھی کررہے ہیں، دوسری جانب امریکی عہدیدارنے تصدیق کی ہے کہ دھماکے میں تین امریکی فوجی زخمی ہوئے ہیں۔
We can confirm that the explosion near the Abbey Gate of the Kabul airport has resulted in an unknown number of casualties. We will continue to update.
— Brig. Gen. Patrick Ryder (@PentagonPresSec) August 26, 2021
عرب میڈیا کے مطابق کابل ایئرپورٹ پر ہونے والا دھماکا خودکش تھا، دھماکے کے بعد ایئرپورٹ کے احاطے میں افراتفری پھیل گئی، اسی دوران فائرنگ کی آوازیں بھی سنی گئیں۔
یہ بھی پڑھیں: کابل ایئر پورٹ پر بڑے حملے کا خطرہ، انتباہ جاری
سوشل میڈیا پر دھماکے کے بعد زخمیوں کی تصاویر تیزی سے وائرل ہورہی ہیں، جس میں دیکھا جاسکتا ہے کہ دھماکے کے بعد کابل ایئرپورٹ کے اطراف دھوئیں کے گہرے بادل چھائے ہوئے ہیں جبکہ خودکش دھماکے میں زخمی ہونے والے افراد کو لوگ اپنی مدد آپ کے تحت ٹرالیوں میں اسپتال منتقل کررہے ہیں۔
Photos: Casualties from blast near Kabul airport this evening. #Afghanistan pic.twitter.com/ZnbQrKf2Yh
— TOLOnews (@TOLOnews) August 26, 2021
ترک میڈیا نے بھی کابل ایئرپورٹ پر ہونے والے دھماکے کو خودکش قرار دیتے ہوئے بتایا کہ دو دھماکے ہوئے ہیں، تاہم کابل ایئرپورٹ پر موجود ترک افواج محفوظ ہیں۔
دھماکے کے بعد امریکی سفارت خانے نے کابل ایئرپورٹ پر موجود اپنے شہریوں کو فوری طور پر ایئرپورٹ کے احاطے سے نکلنے کی ہدایت جاری کی ہیں۔
برطانیہ کی جانب سے بھی کابل دھماکے کے بعد ردعمل سامنے آگیا ہے، برطانوی وزارت دفاع کی جانب سے جاری مختصر بیان میں کہا گیا ہے کہ معلوم کررہے ہیں کہ کابل ائیرپورٹ پرکیا صورتحال ہے؟،برطانوی فوجی اور شہریوں کی حفاظت ہماری اولین ترجیح ہے۔
