کراچی : سپر ہائی وے نیو سبزی منڈی کے قریب بھڑک اٹھنے والی آگ سے لکڑی کی پیٹیوں کے پچیس گودام جل کر راکھ ہوگئے، کئی گھنٹے کی جدوجہد کے بعد تیسرے درجے کی آگ پر قابو پالیا گیا۔
تفصیلات کے مطابق کراچی کی نیوسبزی منڈی میں پیٹیوں کے گودام میں خوفناک آگ بھڑک اٹھی، آگ دیکھتے ہی دیکھتے پھیلتی چلی گئی، آتشزدگی کے باعث25گوداموں میں رکھی لاکھوں روپے مالیت کی لکڑی کی پیٹیاں جل کر راکھ ہوگئیں، تاہم آگ لگنے کے باعث کوئی جانی نقصان نہیں ہوا۔
فائر بریگیڈ کے عملے نے کئی گھنٹے کی جدوجہد کے بعد تیسرے درجے کی آگ پر قابو پالیا۔ اس حوالے سے عینی شاہدین کا کہنا ہے کہ فائر بریگیڈ کا عملہ دیر سے پہنچا اور جو گاڑیاں آئیں ان میں پانی کے پائپ پھٹے ہوئے تھے۔
ہوا کے باعث آگ کے شعلوں نے پھیلتے پھیلتے بیس سے پچیس گودام راکھ کردیئے ۔ فائر بریگیڈ کی آٹھ گاڑیوں نے فائر فائٹنگ آپریشن کیا، بحریہ ٹاؤن کے دو فائر ٹینڈر بھی مدد کو پہنچے, کئی گھنٹوں کی سخت محنت کے بعد آگ پر قابو پالیا گیا۔
