بنی گالہ تجاوزات کیس، سپریم کورٹ کا عمران خان کو جرمانہ ادا کرنے کا حکم
The news is by your side.

Advertisement

بنی گالہ تجاوزات کیس، سپریم کورٹ کا عمران خان کو جرمانہ ادا کرنے کا حکم

اسلام آباد: بنی گالہ تجاوزات کیس میں سپریم کورٹ نے عمران خان کو جرمانہ ادا کرکے رپورٹ دینے کا حکم دے دیا ، چیف جسٹس نے کہا عمران خان کی اپنی پراپرٹی پر غیر قانونی تعمیرات ہیں، انہیں سب سے پہلے جرمانہ دینا ہوگا۔

تفصیلات کے مطابق سپریم کورٹ میں چیف جسٹس کی سربراہی میں بنی گالہ میں تجاوزات سے متعلق کیس کی سماعت ہوئی ، ایڈیشنل اٹارنی جنرل نے سروے آف پاکستان کی رپورٹ پیش کی۔

ایڈیشنل اٹارنی جنرل نے کہا سی ڈی اے، وفاقی محتسب اور سروے آف پاکستان رپورٹ ایک جیسی ہیں، جس پر چیف جسٹس نے استفسار کیا تجاوزات کو کیسے ختم کیا جائے؟ بنی گالہ میں تجاوزات کےعلاوہ سیکیورٹی، آلودگی کےمسائل بھی ہیں۔

چیف جسٹس نے ریمارکس میں کہا اب نئی حکومت آگئی ہے ان معاملات کو حل کرے، جنھوں نےغیرقانونی تعمیرات کیں ان سے جرمانے لیے جائیں، حکومت اپنے جرمانے بھی ادا کرے اور دوسرے لوگوں سے بھی لے، تجاوزات کی حد تک معاملے کو نمٹا دیتے ہیں، حکومت کو چاہئے ان کے گھر کی ریگولیشن نہیں تو جرمانہ دیکر کرالے۔

ایڈیشنل اٹارنی جنرل کا کہنا تھا کہ ہم بوٹنیکل گارڈن کی چار دیواری بنا رہے ہیں، سروے آف پاکستان نے 21کلومیٹر کی نشاندہی کی ہے، جس میں 613.49کنال اراضی پر ناجائز قبضہ ہے۔

اے اے جی نے مزید کہا کہ عدالت حکم دے تو قابضین سے اراضی و اگزار کرائی جائے، نالےمیں اتنی زیادہ گندگی ڈال دی گئی کہ پانی آگے نہیں جا رہا۔

دوران سماعت بنی گالہ کے رہائشی کے وکیل لطیف کھوسہ نے دلائل میں کہا مجھے رپورٹ کا علم نہیں، سرکاری نشاندہی میں45کنال کو145کنال کر دیا گیا، اس عمل سے منظور نظر کو فائدہ پہنچانے کی کوشش کی گئی۔

چیف جسٹس نے کہا مفاد عامہ کا معاملہ ہے،قانون کے مطابق معاملے کو دیکھنا ہے، جس پر وکیل لطیف کھوسہ کا کہنا تھا کہ ہم بھی یہی چاہتے ہیں، جوڈیشل کالونی کا کچھ حصہ بوٹنیکل گارڈن میں ہے، جسے نظر انداز کیا گیا۔

جسٹس ثاقب نثار نے ریمارکس دیئے تجاوزات کو جمعہ تک ریگولرائز کرکے بتایا جائے، وزیراعظم پاکستان کے کہنے پر یہ نوٹس لیا، عمراں خان نے وزیراعظم بننے سے پہلے5تجاویز خود دی تھیں، عمران خان اب حکومت میں ہیں ان کو اقدامات کرنے چاہئے۔

جس پر وکیل عمران خان نے کہا منظوری کے لیے کابینہ کا اجلاس بلایا ہے، جس پرچیف جسٹس کا کہنا تھا کہ اس کیس کو جلد نمٹانا چاہتے ہیں۔

سپریم کورٹ نےبنی گالہ تجاوزات کیس میں عمران خان کو جرمانہ ادا کرکے رپورٹ دینے کا حکم دے دیا۔

چیف جسٹس نے کہا عمران خان کی اپنی پراپرٹی پر غیر قانونی تعمیرات ہیں،عمران خان کو اب سب سے پہلے جرمانہ دینا ہے، جرمانہ جمع کراکر رپورٹ پیش کریں۔

بعد ازاں بنی گالہ تجاوزات سے متعلق کیس کی سماعت جمعہ تک ملتوی کردی گئی۔

Comments

comments

یہ بھی پڑھیں