اسلام آباد : سپریم کورٹ نے فوجی عدالتوں سے سزا پانے والے 196 دہشت گردوں کی رہائی کا حکم معطل کرتے ہوئے وفاقی حکومت سے دہشت گردوں کے مقدمات کی تفصیلات طلب کرلیں۔
تفصیلات کے مطابق سپریم کورٹ میں جسٹس مشیر عالم کی سربراہی میں تین رکنی بنچ نے دہشت گردوں کی رہائی سے متعلق کیس کی سماعت کی۔
جسٹس قاضی امین نے ریمارکس دیتے ہوئے کہا کہ فوجی عدالتوں سے ٹرائل کے بعد مجرمان کو سزا ہوئی، ہر کیس کے اپنے شواہد اور حقائق ہیں، کیا مجرمان رہائی کے فیصلے کے بعد جیلوں میں ہیں؟
ایڈیشنل اٹارنی جنرل نے کہا کہ مجرمان جیلوں میں ہیں، عدالت ہائی کورٹ کے فیصلے کو معطل کرے۔
سپریم کورٹ نے پشاور ہائی کورٹ کا 196 دہشت گردوں کی رہائی کا حکم معطل کرتے ہوئے تمام فریقین کو نوٹس جاری کردیے۔
عدالت نے وفاقی حکومت سے دہشت گردوں کے مقدمات کی تفصیلات طلب کرتے ہوئے کیس کی سماعت جمعہ تک ملتوی کر دی۔
خیال رہے پشاور ہائی کورٹ نے 196 دہشتگردوں کی رہائی کاحکم دیا تھا اور ، فوجی عدالتوں میں تمام دہشت گردوں کا ٹرائل ہوا تھا۔
