لندن: جنوبی برطانیہ میں اڑنے والی چیونٹیوں کی بارش ہو گئی، محکمہ موسمیات بھی پریشان ہو گیا۔
برطانوی میڈیا کے مطابق برطانیہ کے جنوب مشرقی ساحل پر گزشتہ روز چیونٹیوں کا بادل چھا گیا تھا، محکمہ موسمیات نے پہلے اسے بارش سمجھا، تاہم معلوم ہوا کہ وہ اڑنے والی چیونٹیوں کا جھنڈ ہے جس نے علاقے کو ڈھانپ لیا ہے۔
میٹ آفس کا کہنا تھا کہ جنوبی انگلینڈ کے ساحل کے قریب اڑنے والی چیونٹیوں کا بڑا جھنڈ موجود ہے، 50 میل چوڑا چیونٹیوں کا یہ جھنڈ خلا سے بھی دیکھا جا سکتا ہے، ابتدا میں خلا سے دیکھنے پر یہ بادل دکھائی دیے، تاہم یہ اڑنے والی چیونٹیوں کا جھنڈ نکلا۔
ترجمان محکمہ موسمیات نے بتایا کہ چیونٹیوں کا پتا میٹ آفس کے ریڈار سے چلا، چیونٹیوں کا یہ جھنڈ کینٹ اور سسکس کے پچاس میل علاقے پر پھیلا ہوا تھا، لندن کے اوپر بھی چھوٹے جھنڈ دیکھے گئے۔
It’s not raining in London, Kent or Sussex, but our radar says otherwise…📡
The radar is actually picking up a swarm of #flyingants across the southeast 🐜
During the summer ants can take to the skies in a mass emergence usually on warm, humid and windless days #flyingantday pic.twitter.com/aMF6RxR943
— Met Office (@metoffice) July 17, 2020
میٹ آفس نے اس سلسلے میں ایک ٹویٹ میں لکھا کہ لندن، کینٹ اور سسکس پر بارش نہیں ہو رہی ہے اگرچہ ہمارے ریڈار نے یہی کہا تھا، تاہم ریڈار پر جو چیز نظر آئی ہے وہ اڑنے والی چیونٹیوں کا جھنڈ ہے۔
ٹویٹ میں میٹ آفس نے کہا کہ موسم گرما کے دوران چیونٹیاں عام طور پر گرم، مرطوب اور بے ہوا دنوں میں آسمانوں میں اڑان بھر سکتی ہیں۔ محکمے کے ترجمان نے بتایا کہ جھنڈ میں لاکھوں چیونٹیاں تھیں۔