سوشل میڈیا پر ایک ویڈیو تیزی سے وائرل ہوئی ہے جس میں ایک شخص کو جمی ہوئی جھیل کے نیچے تیراکی کرتے ہوئے دیکھا جاسکتا ہے۔
اگر کوئی آپ سے سخت سردی میں ٹھنڈے پانی سےنہانے کو کہے تو آپ کا سیدھا جواب ناں میں ہوگا اور اگر کوئی آپ کو برفیلی جھیل میں تیرنے کا کہے تو آپ اسے پاگل ہی کہیں گے۔
لیکن حال ہی میں ایک پیشہ ور تیراک نے انسٹاگرام اور ٹک ٹاک پر ایک کلپ شیئر کیا ہے جس میں اسے جمی ہوئی جھیل کے نیچے تیرتے ہوئے دکھایا گیا ہے۔
سلواکیہ میں فلمائی گئی اس ویڈیو میں بورس اوراویک نامی چھتیس سالہ شخص اپنے دوستوں اور ٹیم کو اپنی تیراکی کی مہارت کا مظاہرہ دکھانے کے لیے جمی ہوئی جھیل کے نیچے جاکر تیراکی کرتا ہے۔
ویڈیو میں دیکھا جاسکتا ہے کہ بورس برفیلی جھیل کے نیچے جانے سے قل گہری سانس لیتا ہے جس کے بعد وہ جھیل کے اندر اتر کر برف کی پتلی تہہ کے نیچے تیراکی شروع کرتا ہے۔
تاہم اسی دوران بورس اپنی سمت کھودیتا ہے اور دائیں طرف مڑنے لگتا ہے جس پر جھیل کی جمی ہوئی سطح پر موجود اس کی ٹیم کے ارکان میں خوف وہراس پھیل جاتا ہے۔
چند سیکنڈ بعد ٹیم کے ارکان کو منجمد برف کے اوپر گھبراتے ہوئے دیکھا گیا جب بورس اپنا راستہ تلاش کرنے کی کوشش کررہا ہوتا ہے، ان میں سے ایک برف پر چھلانگ لگاتا ہے تاکہ اسے توڑ کر بورس کو نکالا جاسکے۔
تاہم بورس غلط موڑ کا احساس ہوتے ہی تیزی سے دوسری طرف مڑ جاتا ہے، وہ خود اپنا راستہ ڈھونڈ لیتا ہے اور تیراکی کی اسی جگہ پر واپس آجاتا ہے جہاں سے اس نے تیراکی شروع کی تھی۔
اس کلپ کو انسٹا گرام اور ٹک ٹاک پر اب تک لاکھوں لائنک مل چکے ہیں۔
اطلاعات کے مطابق یہ اسٹنٹ سلواکیہ میں شوٹ کیا گیا۔
یہ بہادر تیراک صرف تیراک ہی نہیں بلکہ بال ہاکی میں چار بار کا عالمی چیمپیئن، ریڈ بل آئس کراس ایتھلیٹ اورکراس فٹ ایتھلیٹ بھی ہے۔
