لاہور / ملتان : پنجاب میں سوائن فلو بےقابو ہوتا جارہا ہے۔ ملتان میں مزید دو افراد جاں بحق ہوگئے۔ جس کے بعد پنجاب میں سوائن فلو سے ہلاکتوں کی کل تعداد اکیس ہوگئی۔
تفصیلات کے مطابق سوائن فلو کی وباء نے پنجاب میں پنجے گاڑھ لئے ، پنجاب حکومت کے تمام تر دعوؤں کے باوجود صوبے میں سوائن فلو سے مرنے والوں کی تعداد میں مسلسل اضا فہ ہو تا جا رہا ہے۔
ملتان میں اس مرض نے ایک اور شخص کو موت کی نیند سلادیا، نشتر ہسپتال ملتان میں زیر علاج تصورعلی اور سکینہ میں سوائن فلو کی تصدیق ہوئی۔ جبکہ گزشتہ روز قاسم بیلہ کا رہائشی بیس سالہ سہیل دم توڑ گیا تھا۔
محکمہ صحت پنجاب کے حکام کا کہنا ہے کہ صوبے بھرکے مختلف اسپتالوں میں اس وقت سوائن فلو کےچونسٹھ مریض موجود ہیں۔
واضح رہے کہ سوائن فلو کے مریضوں کی سب سے زیادہ تعداد راولپنڈی اورملتان میں رپوٹ ہو ئی ہے۔ سوال یہ پیدا ہوتا ہے کہ ہر سال انہی دنوں میں سوائن فلو حملہ آور ہو کر درجنوں افراد کو موت کی وادی میں دھکیل دیتاہے لیکن عوام کی جان و ما ل کے تحفظ کے ذمہ دارحکمران سب ٹھیک ہے کا راگ کیوں الاپ رہے ہیں۔
