کراچی : جدہ سے کراچی ایئرپورٹ آنیوالے مسافر میں منکی پاکس وائرس کی علامات پائی گئیں تاہم مسافر کے خون کے نمونے ٹیسٹ کے لیے لیب بھیج دیئے گئے ہیں۔
تفصیلات کے مطابق جدہ سے کراچی ایئرپورٹ آنیوالے مسافر میں منکی پاکس وائرس کی علامات پائی گئیں ، جس کے بعد مسافر خرم شہزاد کو وزارت صحت حکام نے آئیسولیشن وارڈ منتقل کردیا ہے۔
ذرائع نے بتایا کہ مسافر غیر ملکی ایئرلائن کے ذریعے جدہ سے کراچی پہنچا، مسافر میں ایئرپورٹ پر دوران اسکریننگ منکی پاکس کی علامات تھیں تاہم منکی پاکس کی مزید تصدیق کے لئے مسافر کو آئیسولیٹ کردیا گیا ہے۔
اس حوالے سے ترجمان محکمہ صحت نے اپنے بیان میں کہا گیا ہے کہ جدہ سےآنیوالےایک مسافر کےچہرےپرچھوٹے اسپاٹ پائے گئے ، مسافر کے چہرے پر اسپاٹ کی مماثلت چکن پاکس جیسی ہے۔
ترجمان کا کہنا تھا کہ مسافرکے خون کانمونہ حاصل کرلیاگیا ہے اور خون کے نمونے ٹیسٹ کے لیے لیب بھیجے گئے ہیں، رپورٹ 24 گھنٹے بعد آئے گی۔
یاد رہے بین الااقوامی پروازوں سے کراچی آنے والے تین مسافروں میں منکی پاکس کی تشخیص ہوئی تھی۔
منکی پاکس وائرس میں مبتلا ایک سومالی باشندہ اور دو پاکستانی شامل تھے، تینوں مسافروں کو ابتدائی کارروائی کے بعد محکمہ صحت نے بھٹائی آباد سینٹر منتقل کر دیا گیا تھا۔
بعد ازاں بیرون ملک سے کراچی آنے والے 3 مسافروں منکی پاکس کی تصدیق نہیں ہوئی، رپورٹس منفی آنے پر انھیں گھر جانے کی اجازت دے دی گئی تھی۔
خیال رہے منکی پاکس سے بچاؤ کیلئے قومی ادارہ صحت کی جانب سے ایڈوائزری جاری کی گئی ہے۔
قومی ادارہ صحت کی جانب جاری ہونے والے ہدایت نامے میں بتایا گیا ہے کہ منکی پاکس چوہوں، جنگلی جانوروں سے انسانوں میں منتقل ہونے والی بیماری ہے، اس سے متاثرہ شخص 5 سے 21 دنوں میں ریکور ہو سکتا ہے۔
قومی ادارہ صحت نے عوام کو ہدایت کی ہے کہ احتیاطی تدابیر اختیارکریں، ہاتھ بار بار دھوئیں، سینی ٹائزر کا استعمال کریں، وائرس کا مبتلا افراد پیناڈول، پیراسیٹامول اور بروفین کا استعمال کریں۔
