The news is by your side.

ٹی 20 ورلڈ کپ، پاکستان اور جنوبی افریقہ آج ڈو اور ڈائی میچ میں ٹکرائیں گے

آسٹریلیا میں کھیلے جا رہے ٹی 20 ورلڈ کپ کے سپر 12 مرحلے میں پاکستان اور جنوبی افریقہ آج ڈو اینڈ ڈائی میچ میں ٹکرائیں گے۔

پاکستانی وقت کے مطابق میچ دوپہر ایک بجے سڈنی کرکٹ گراؤنڈ میں شروع ہوگا، میچ میں پاکستان کی فتح اس کے سیمی فائنل میں پہنچنے امکانات روشن رکھے گی اور شکست اسے ٹورنامنٹ سے باہر کردے گی جب کہ جنوبی افریقہ سیمی فائنل میچ میں پہنچ جائے گا۔

ٹی 20 ورلڈ کپ میں پاکستان جنوبی افریقہ کیخلاف ناقابل شکست ہونے کا اعزاز رکھتا ہے اور اگلے مرحلے تک جانے کے لیے اس کو اپنا یہ اعزاز برقرار رکھنا ہوگا۔

اس اہم میچ سے قبل پاکستان کو بڑا دھچکا پہنچا ہے اور قومی ٹیم کے جارح مزاج بلے باز فخر زمان کی گھٹنے کی پرانی انجری دوبارہ لوٹ آنے کے باعث وہ نہ صرف اس میچ بلکہ ٹورنامنٹ سے بھی باہر ہوگئے ہیں۔

پاکستانی ٹیم انتظامیہ کہ درخواست پر آئی سی سی ٹیکنیکل کمیٹی نے فخر زمان کی جگہ محمد حارث کو اسکواڈ میں شامل کرلیا ہے۔

دوسری جانب سڈنی میں آج ہونے والے اہم میچ کے حوالے سے پاکستانی شائقین نے اپنی ٹیم سے اب بھی امیدیں وابستہ کی ہوئی ہیں، پاکستانی شائقین کی بڑی تعداد آج گراؤنڈ میں اپنی ٹیم کا جوش و جذبہ بڑھانے کے لیے موجود ہوں گے جب کہ سڈنی میں باقاعدہ ایک بس ٹرپ کا بھی اہتمام کیا گیا ہے۔

Comments

یہ بھی پڑھیں