کیا انگلینڈ تیسری بار ٹی ٹوئنٹی ورلڈکپ کا فائنل کھیلنے کا اعزاز حاصل کرسکے گا یا نیوزی لینڈ ورلڈکپ میں خراب قسمت کو پس پشت ڈال کر پہلی بار ٹی ٹوئنٹی ورلڈکپ کے فائنل تک رسائی حاصل کرے گا؟ فیصلہ آج ہوگا۔
تفصیلات کے مطابق ٹی20 ورلڈ کپ کا سیمی فائنل آج ابوظبی کے شیخ زید کرکٹ اسٹیڈیم میں انگلینڈ اور نیوزی لینڈ کے درمیان کھیلا جائے گا، میچ پاکستانی وقت کے مطابق شام سات بجے شروع ہوگا۔
انگلینڈ نے گروپ اے کے ابتدائی 4 میچز میں کامیابی حاصل کرکے سیمی فائنل تک رسائی حاصل کی لیکن آخری گروپ میچ میں ناقابل شکست رہنے والی انگلینڈ کو جنوبی افریقا کے ہاتھوں شکست کا سامنا کرنا پڑا۔
نیوزی لینڈ نے گروپ کے ابتدائی میچ پاکستان سے شکست کے بعد لگاتار 4 میچوں میں فتح حاصل کر کے سیمی فائنل میں جگہ بنائی۔
یاد رہے کہ ورلڈ کپ 2019 کے فائنل میں انگلینڈ نے نیوزی لینڈ کو سنسنی خیز مقابلے کے بعد شکست دی تھی۔
قابل ذکر بات یہ ہے کہ دونوں ٹیموں کے کپتان وہی ہیں جو 2019 ورلڈ کپ فائنل میں تھے، جبکہ اسکواڈز میں بہت سے کھلاڑی بھی وہی ہیں جنہیں میگا ایونٹ کا فائنل کھیلنے کا تجربہ ہے۔
دونوں ٹیموں سےمتعلق چند اہم حقائق
دو ہزار انیس میں انگلینڈ نے نیوزی لینڈ کو سنسنی خیز مقابلے کے بعد 50 اوورز کے ورلڈ کپ میں شکست دی، انگلینڈ پہلی بار فاتح بنا۔
نیوزی لینڈ آئی سی سی ٹیسٹ چیمپئن شپ کا فاتح ہے، کیویز نے یہ فتح بھارت کو ہراکر حاصل کی۔
کیویز نے کبھی ٹی ٹوئنٹی ورلڈکپ کا فائنل نہیں کھیلا۔
انگلینڈ آج کا میچ جیت کر تیسری بار ٹی 20 ورلڈکپ کے فائنل میں جانےکی کوشش کرےگا، 2010 میں انگلینڈ نے آسٹریلیا کوشکست دے کرپہلی بار ٹائٹل اپنےنام کیا تھا، 2016 میں انگلش ٹیم بدقسمت رہی جب وہ ویسٹ انڈیزسےفائنل آخری اوور میں ہاری۔
ہیڈ ٹو ہیڈ مقابلے
ٹی ٹوئنٹی فارمیٹ میں انگلینڈ کو برتری حاصل ہے، دونوں ٹیموں کے درمیان مجموعی طور اکیس ٹی ٹوئنٹی میچز کھیلےگئے، انگلش ٹیم تیرہ اور کیویز سات میں کامیابی ملی۔
