آسٹریلیا میں جاری ٹی ٹوئنٹی ورلڈ کپ کے سپر 12 کے اہم ترین میچ میں بنگلہ دیش نے پاکستان کو جیت کے لیے 128 رنز کا ہدف دیا ہے، فاتح ٹیم سیمی فائنل کھیلے گی۔
ایڈیلیڈ میں کھیلے جا رہے گروپ ٹو کے اہم ترین میچ میں بنگلہ دیش نے ٹاس جیت کر پہلے بیٹنگ کا فیصلہ کیا اور مقررہ 20 اوورز میں 8 وکٹوں کے نقصان پر 127 رنز بنائے، سوائے اوپنر نجم الحسین کے علاوہ کوئی اور بلے باز پاکستانی بولرز کا دلیری کے ساتھ سامنا نہ کرسکا۔
بنگلہ دیش کی پہلی وکٹ 21 کے مجموعی اسکور پر گری جب بھارت کے خلاف دھواں دھار بلے بازی کرنے والے لٹن داس 10 رنز بنا کر پویلین لوٹ گئے ان کی قیمتی وکٹ شاہین شاہ آفریدی نے شان مسعود کا کیچ بنوا کر حاصل کی، سومیہ سرکار اور نجم الحسین کے درمیان 52 رنز کی قیمتی پارٹنر شپ ہوئی۔
اس سے قبل کہ یہ پارٹنر شپ مزید خطرناک ہوتی، قومی ٹیم کے نائب کپتان شاداب خان نے سومیہ سرکار کو 20 کے انفرادی اسکور پر چلتا کیا اس بار بھی کیچ شان مسعود نے تھاما، اپنی اگلی ہی گیند پر شاداب خان نے بنگلہ کپتان شکیب الحسن کو کھاتہ کھولے بغیر ایل بی ڈبلیو آؤٹ کرکے بنگلہ دیش کو بڑا دھچکا پہنچایا۔
بنگلہ دیشی اوپنر نجم الحسین نے نصف سنچری اسکور کی تاہم ان کی پیش قدمی کو پارٹ ٹائم بولر افتخار احمد نے روکا پاکستان کے لیے خطرہ بنتے بلے باز کو 90 کے مجموعے پر کلین بولڈ کردیا، انہوں نے 54 رنز اسکور کیے۔
107 کے مجموعے پر بنگلہ دیش کے مصدق حسین کو شاہین شاہ آفریدی نے بولڈ کیا تو آدھی بنگلہ ٹیم پویلین لوٹ چکی تھی، اسی اوور میں شاہین نے نئے آنے والے بلے باز نور الحسن کو بغیر کوئی رن بنائے آؤٹ کردیا۔
اگلے ہی اوور میں شاہین آفریدی نے کپتان بابر اعظم کی مدد سے تسکین احمد ایک رن بنانے کے بعد ہی واپس بھیج دیا، بنگلہ دیش کی اننگ کے آخری اوور میں حارث رؤف نے 7 رنز پر نسوم احمد کو آؤٹ کردیا۔
شاہین شاہ آفریدی نے اپنے کوٹے کے 4 اوور میں 22 رنز دے کر 4 وکٹیں حاصل کیں، شاداب خان نے 30 رنز دے کر 2 کھلاڑیوں کو آؤٹ کیا، افتخار احمد نے 15 رنز دے کر نصف سنچری بنانے والے نجم الحسین کی قیمتی وکٹ لی۔
قومی ٹیم کے کپتان بابر اعظم نے ٹاس ہارنے کے بعد کہا تھا گزشتہ میچ کی جیت سے اعتماد ملا ہے اور اس مومینٹم کو لے کر چلیں گے، یہ میچ اہم ہے اور اس کو جیتنے کی بھرپور کوشش کریں گے۔
