دبئی: ٹی ٹوئنٹی ورلڈکپ کوالیفائنگ راؤنڈ میں عمان نے تاریخ فتح حاصل کرتے ہوئے تاریخ رقم کی، خلیجی ملک کی فتح میں اہم کردار کون تھے؟ جان کر آپ بھی حیران ہوجائیں گے۔
عاقب الیاس سلہری نے آج عمان کی جانب سے 43 گیندوں پر 50 رنز کی اننگز کھیلی جبکہ جتیندر سنگھ نے 73 رنز کی ناقابل شکست اننگز کھیل کر تاریخی فتح عمان کی جھولی میں ڈالی۔
کیا آپ جانتے ہیں کہ عاقب الیاس سلہری کا تعلق کہاں سے ہیں ؟ تو چلیں آپ کو بتائیں کہ عاقب الیاس سلہری پاکستانی نژاد ہیں جو پانچ سمتبر انیس سو بانوے کو سیالکوٹ میں پیدا ہوئے، بعد ازاں عمان میں جابسے آج پاپوا نیو گنی کے خلاف 43 گیندوں پر 50 رنز کی اننگز کھیل کر خود کو ثابت بھی کیا۔
یہ بھی پڑھیں:ٹی ٹوئنٹی ورلڈکپ: افتتاحی میچ میں عمان کامیاب
دوسرے اینڈ پر موجود بھارت کے شہر لدھیانہ سے آنے والے جتیندر سنگھ نے اپنی عمدہ بلے بازی سے انہوں نے 73 رنز کی ناقابل شکست اننگز کھیلی، دونوں نے مل کر ناقابل شکست رہتے ہوئے 131 رنز جوڑے اور اپنی ٹیم کو 10 وکٹ سے فتح دلوائی۔
پاکستانی اور بھارتی شہری کی اسپورٹس مین اسپرٹ نے ٹینس میں انڈو۔ پاک جوڑی اعصام الحق اور روہن بوپانا کی یاد تازہ کردی، جب فتح کے بعد دونوں کھلاڑیوں نے ایک دوسرے کو گرم جوشی سے گلہ لگایا اور دونوں اقوام کو پیغام دیا کہ کھیل مختلف ملکوں میں بسنے والوں کو یکجاں کرنے کا اہم ذریعہ بن سکتے ہیں۔
واضح رہے کہ ٹی ٹوئنٹی ورلڈکپ کے کوالیفائنگ راؤنڈ کے پہلے میچ میں میزبان عمان نے پاپوا نیو گنی کو 10 وکٹوں سے ہرایا تھا۔
