قومی ٹیم کے سابق کپتان وسیم اکرم نے زمبابوے کے ہاتھوں اپ سیٹ شکست پر ٹیم کو آڑے ہاتھوں لے لیا۔
اے اسپورٹس کے پروگرام ’دی پویلین‘ میں گفتگو کرتے ہوئے سوئنگ کے سلطان وسیم اکرم نے کہا کہ بابر اعظم دوستی یاری چھوڑ کر ٹیم کا سوچیں اگر میں کپتان ہوتا تو شعیب ملک کو ٹیم میں ضرور شامل کرتا۔
انہوں نے کہا کہ پاکستان کی ٹیم کوئی گلی محلے کی ٹیم نہیں کہ جاننے والوں کو اس میں شامل کیا جائے۔
لیجنڈ فاسٹ بولر نے کہا کہ اگر مجھے مرضی کی ٹیم نہ ملتی تو چیف سلیکٹر اور چیئرمین سے لڑتا اگر بات نہ مانی جاتی تو کپتانی ہی چھوڑ دیتا۔
وسیم اکرم کا کہنا تھا کہ ٹیم کی سلیکشن ہونے کے بعد ذمہ داری کپتان کی ہوتی ہے، کپتان کو پتا ہونا چاہیے کہ وہاں کی پچز کیسی ہے، ورلڈ کپ کیسے جیتنا ہے۔
سابق کپتان نے کہا کہ لیکن اب ہماری ٹیم اس پوزیشن میں آگئی ہے کہ اگر یہ ٹیم جیت جائے یا وہ ٹیم ہارے تو ہماری جگہ بن سکتی ہے۔
ٹی ٹوئنٹی ورلڈکپ میں گروپ ٹو کے میچ میں گزشتہ روز زمبابوے نے پاکستان کو سنسنی خیز مقابلے کے بعد ایک رن سے شکست دی تھی۔
View this post on Instagram
زمبابوے کی جانب سے دیے گئے 131 رنز کے ہدف کے تعاقب میں پاکستان ٹیم مقررہ اوورز میں 8 وکٹوں پر 129 رنز بناسکی تھی۔
قومی ٹیم اپنا گلا میچ 30 اکتوبر کو نیدرلینڈز کے خلاف کھیلے گی جبکہ گرین شرٹس کی ٹی 20 ورلڈ کپ سیمی فائنل میں رسائی مشکل ہوگئی ہے۔
