لاہور : سربراہ پاکستان عوامی تحریک ڈاکٹر طاہر القادری نے کہا ہے کہ رپورٹ موصول ہوگئی ہے جو شہبازشریف اور رانا ثناءاللہ کے خلاف ٹھوس شواہد بن سکتی ہے.

وہ لاہور میں پریس کانفرنس سے خطاب کر رہے تھے، سربراہ پاکستان عوامی تحریک کا کہنا تھا کہ عجلت میں کوئی بھی قدم نہیں اٹھانا چاہتے، میرا کنٹینر تیار ہے اور اب کارکنان بھی تیار رہیں انہیں کسی بھی وقت کسی بھی قسم کی کال دی جاسکتی ہے اور جب اصل رپورٹ ملے گی تو کاپی سے اس کا موازنہ کیا جائے گا.

انہوں نے کہا کہ جسٹس نجفی کمیشن کی اصل کاپی ابھی تک دستیاب نہیں ہوسکی ہے البتہ ابھی کمیشن رپورٹ کی ایک کاپی ملی ہے جس کا مطالعہ کر رہے ہیں اور ابھی مشاورت کےعمل سے گزر رہے ہیں کیوں کہ ہم بغیر مشاورت کوئی قدم نہیں اٹھانا چاہتے چنانچہ کیا کیا آپشنزہیں اور کیا قدم اٹھانے ہیں اس کا اعلان کل کریں گے.

اسی سے متعلق :  حکومت نے باقر نجفی کمیشن رپورٹ میں تبدیلی کی، ڈاکٹرطاہرالقادری

طاہر القادری نے کہا کہ عمرہ نفلی عمل ہے جب کہ شہیدوں کے خون کا حق فرض ہے اس لیے اس فرض کی ادائیگی کے لیے سب لوگ کمر کس لیں اور شہداء کا قصاص لینے کا وقت آگیا ہے جو وزیر اعلیٰ پنجاب اور وزیر قانون رانا ثنا کے استعفیٰ سے پورے ہوگا کیوں ظالموں کے خلاف اقدام کے بغیر مظلوموں کی داد رسی ممکن نہیں.

پڑھیں :  جسٹس باقر نجفی کمیشن رپورٹ  

خیال رہے کہ گزشتہ روز لاہور ہائی کورٹ کے حکم پر ماڈل ٹاؤن کی رپورٹ 30 دن کے اندرشائع کرنے کا حکم دیا تھا تاہم پنجاب حکومت نے کل ہی جسٹس باقر نجفی رپورٹ جاری کردی تھی.