site
stats
پاکستان

تیمور قتل کے ملزم پولیس اہلکار کا مزید 3 روزہ ریمانڈ منظور

اسلام آباد: وفاقی دارالحکومت میں نوجوان تیمور کو فائرنگ کر کے ہلاک کرنے والے پولیس اہلکار سمیع اللہ کو مزید 3 روزہ ریمانڈ پر پولیس کے حوالے کر دیا گیا۔

چند روز قبل اسلام آباد کے سیکٹر آئی 10 میں اشارے کے باوجود کار نہ روکنے پر پولیس اہلکار نے گاڑی پر فائرنگ کر دی تھی جس کے باعث کار میں موجود نوجوان تیمور جاں بحق ہوگیا تھا۔

واقعہ میں ملوث پولیس اہلکار فرار ہوگئے تاہم بعد ازاں انہوں نے خود کو قانون کے سامنے پیش کردیا۔ فائرنگ کرنے والے پولیس اہلکار سمیع اللہ کو پہلے 2 روزہ ریمانڈ پر پولیس کے حوالے کیا گیا۔

تاہم پولیس نے تفتیش کے لیے مزید ریمانڈ طلب کرلیا۔ عدالت نے آئندہ سماعت پر تفتیشی رپورٹ طلب کرتے ہوئے پولیس کی استدعا منظور کرلی۔ ملزم کو مزید 3 روزہ جسمانی ریمانڈ پر پولیس کےحوالے کردیا گیا۔

واضح رہے کہ پولیس کی فائرنگ سے ہلاک ہونے والے تیمور کا تعلق مردان سے تھا۔ پولیس نے پہلے دعویٰ کیا کہ تیمور نشے میں تھا تاہم پوسٹ مارٹم ٹیم نے اس دعوے کی تصدیق نہیں کی۔ ڈاکٹرز کے مطابق تیمور کو سر پر گولی لگی تھی جس سے اس کی موت واقع ہوئی۔

ذرائع کے مطابق واقعے کے بعد پولیس نے معاملہ دبانا چاہا اور بغیر کارروائی لاش پمز اسپتال کے مردہ خانے میں رکھوانے کی کوشش بھی کی۔

اس سے قبل نوجوان کی ہلاکت کے خلاف مشتعل ورثا نے آئی جی پی روڈ پر لاش رکھ کر شدید احتجاج بھی کیا تھا اور پولیس چوکی کو بھی نذر آتش کردیا گیا تھا۔

Print Friendly, PDF & Email
20

Comments

comments

اس ویب سائیٹ پر موجود تمام تحریری مواد کے جملہ حقوق@2018 اے آروائی نیوز کے نام محفوظ ہیں

To Top