The news is by your side.

Advertisement

افغانستان، سیکیورٹی چیک پوسٹ پر طالبان کا حملہ، 15 پولیس اہلکار ہلاک

کابل: افغان صوبے قندوز میں طالبان کے پولیس چیک پوسٹ پر حملے کے نتیجے میں 15 پولیس اہلکار ہلاک ہوگئے۔

غیرملکی خبررساں ادارے کے مطابق افغانستان کے شمالی صوبے قندوز کے ضلع علی آباد میں طالبان کی جانب سے گزشتہ رات سیکیورٹی چیک پوسٹ پر حملہ کیا گیا جس کے نتیجے میں 15 پولیس اہلکار ہلاک اور 2 زخمی ہوگئے۔

افغان حکام کا کہنا ہے کہ اس جھڑپ میں طالبان کو بھی جانی نقصان اٹھانا پڑا ہے۔

دوسری جانب افغان طالبان کے ترجمان ذبیح اللہ مجاہد نے چیک پوسٹ پر حملے کی ذمہ داری قبول کرلی ہے۔

رپورٹ کے مطابق افغانستان کے شمالی صوبے قندوز میں طالبان کا کافی اثرو رسوخ ہے اور صوبے کے متعدد اضلاع پر طالبان قابض ہیں۔

واضح رہے کہ افغانستان کے آدھے رقبے پر طالبان کا قبضہ ہے اور طالبان کی جانب سے متعدد مرتبہ سیکیورٹی فورسز کو نشانہ بنایا جاچکا ہے جن میں بڑی تعداد میں جانی نقصان ہوا ہے۔

مزید پڑھیں: افغان صوبے ننگرہار کی مسجد میں 2 دھماکے، 62 نمازی شہید

اقوام متحدہ کی رپورٹ کے مطابق افغانستان میں رواں سال جولائی سے ستمبر کے درمیان 1174 شہری اپنی قیمتی جانوں سے ہاتھ دھو بیٹھے ہیں۔

برطانوی نشریاتی ادارے کی رپورٹ کے مطابق اگست میں افغانستان میں ہونے والے دھماکوں میں زیادہ تر عام شہریوں کی ہلاکتیں ہوئی ہیں۔

خیال رہے کہ چند روز قبل افغان صوبے ننگرہار کی مسجد میں 2 دھماکے ہوئے تھے جس کے نتیجے میں 62 نمازی شہید اور 100 سے زائد زخمی ہوگئے تھے۔

دھماکے کی ذمہ داری کسی شدت پسند تنظیم کی جانب سے قبول نہیں کی گئی تھی۔

Comments

comments

یہ بھی پڑھیں