کابل: افغان طالبان نے روس سے اپنی امیدیں وابستہ کر لیں، اقوام متحدہ اور افغانستان کے درمیان ثالثی ہو یا ملک کے اندر تعمیر نو کا مسئلہ، طالبان روس کی طرف دیکھنے لگے ہیں۔
تفصیلات کے مطابق طالبان ترجمان ذبیح اللہ مجاہد نے کہا ہے کہ روس اقوام متحدہ اور افغانستان کے درمیان ثالث بن سکتا ہے، افغانستان پر عائد عالمی پابندیوں کے خاتمے اور ملک کے اندر تعمیر نو کے سلسلے میں بھی روس افغانستان کی مدد کر سکتا ہے۔
ذبیح اللہ مجاہد نے کہا کہ اقوام متحدہ کی سلامتی کونسل کے اجلاس میں ہمیں مثبت نتائج کی امید ہے۔
یاد رہے کہ چند دن قبل طالبان نے سہیل شاہین کو اقوام متحدہ کے لیے افغانستان کا سفیر مقرر کیا ہے، سہیل شاہین دوحہ میں طالبان کی مذاکراتی ٹیم میں شامل رہے ہیں اور طالبان کی ترجمانی کا فریضہ بھی انجام دیتے رہے ہیں۔
غیر ملکی میڈیا کے مطابق افغان طالبان کی جانب سے اقوام متحدہ کے سیکریٹری جنرل انتونیو گوتریس کو ایک خط بھی لکھا گیا ہے، جس میں اقوام متحدہ کی جنرل اسمبلی میں اعلیٰ سطح کی بحث میں حصہ لینے کی گزارش کی گئی ہے۔
دوسری طرف اقوام متحدہ کی سلامتی کونسل نے طالبان رہنماؤں پر عائد سفری پابندیاں بھی ختم کر دی ہیں۔
