The news is by your side.

Advertisement

ٹی ایل پی سے مذاکرات شروع، مظاہرین نے یرغمال اہل کار چھوڑ دیے: شیخ رشید

اسلام آباد: وفاقی وزیر داخلہ نے ایک اہم بیان جاری کرتے ہوئے کہا ہے کہ تحریک لبیک پاکستان (ٹی ایل پی) کے ساتھ مذاکرات شروع کر دیے گئے ہیں، جن پولیس اہل کاروں کو ترغمال بنایا گیا تھا انھیں چھوڑ دیا گیا ہے۔

تفصیلات کے مطابق آج وزیر داخلہ شیخ رشید احمد نے ایک ویڈیو بیان جاری کیا ہے، جس میں انھوں نے ٹی ایل پی کے ساتھ مذاکرات شروع ہونے کی اطلاع دی، انھوں نے کہا ٹی ایل پی سے مذاکرات کا پہلا دور ہو چکا ہے، مذاکرات کا دوسرا دور بھی آج صبح ہوگا۔

شیخ رشید نے کہا مظاہرین نے 11 یرغمال پولیس اہل کار چھوڑ دیے ہیں، بات چیت کا پہلا دور کافی بہتری سے مکمل ہوا، اور ٹی ایل پی کے لوگ مسجد رحمت اللعالمین میں چلے گئے ہیں، پولیس بھی پیچھے ہٹ گئی ہے۔

وفاقی وزیر کا کہنا تھا پنجاب حکومت کی پہلی میٹنگ کامیابی سے ہم کنار ہوئی ہے، دوسرے راؤنڈ میں باقی معاملات بھی طے پا جائیں گے، اللہ سے امید ہے ٹی ایل پی سے معاملات خوش اسلوبی سے طے پا جائیں گے۔

گزشتہ روز وفاقی وزیر اطلاعات فواد چوہدری نے کہا کہ لاہور میں پولیس اور رینجرز کو اغوا کیا گیا تھا جس پر مظاہرین کے خلاف آپریشن کیا گیا، انھوں نے کہا کہ حکومت مذاکرات پر یقین رکھتی ہے لیکن بلیک میل نہیں ہوگی، ریاست کالعدم ٹی ٹی پی مسلح گروہ کے سامنے بلیک میل نہیں ہوئی۔

ادھر آج لاہور واقعے کے خلاف مفتی منیب الرحمان نے دیگر علما کے ساتھ کراچی میں پریس کانفرنس کرتے ہوئے ملک بھر میں پر امن پہیہ جام ہڑتال کا اعلان کیا ہے، جس کی حمایت مولانا فضل الرحمان اور جماعت اسلامی سمیت تاجر اور ٹرانسپورٹر تنظمیوں نے بھی کر دی ہے۔

Comments

یہ بھی پڑھیں