ٹنڈوجام : ریلوے ٹریک پر بم دھماکے سے مال گاڑی کی بوگیاں الٹ گئیں، ذکریا ایکسپریس بڑی تباہی سےبچ گئی۔ بارہ گھنٹے گزر نے کے باوجود اب تک ٹریک کو بحال نہیں کیا جاسکا۔
تفصیلات کے مطابق ٹنڈوجام کے قریب دہشت گردی کی واردات میں بم دھماکے باعث مال گاڑی کی بوگیاں الٹ گئیں۔
دوسری جانب سے آنے والی زکریا ایکسپریس کےڈرائیور کی حاضر دماغی نے ٹرین کو بڑی تباہی سےبچالیا، دھماکے کے باعث مال گاڑی کی تین بوگیاں اپ ٹریک پرالٹ گئی تھیں۔
تیز رفتار زکریا ایکسپریس دوسرے ٹریک پرگری مال گاڑیوں کےقریب پہنچی توڈرائیور نےانتہائی کم وقت میں بریک لگاکرٹرین کوحادثے سےبچالیا۔
ڈی آئی جی حیدر آباد کا کہنا ہے کہ ٹرین حادثہ دہشت گردی ہے، دھماکہ ریلوے ٹریک پر نصب بم کےباعث ہوا، حادثے کے باعث ٹرین سروس معطل ہوگئی۔
علاوہ ازیں واقعے کے بارہ گھنٹے گزرنے کے باوجود اب تک ٹریک کو بحال نہیں کیا جاسکا۔مسافروں کو شدید گرمی میں مشکلات کا سامنا ہے۔
حیدرآباد اور کوٹری اسٹیشن پر پانچ ٹرینیں کھڑی ہیں۔ حیدرآباد اور کوٹری ریلوے اسٹیشن پر پانچ ٹرینیں کئی گھٹنوں سے کھڑی ہیں۔
پاکستان اور علامہ اقبال ایکسپریس شام چار بجے سے اسٹیشن پر کھڑی ہیں، بزنس ٹرین،قراقرم اور ملت ایکسپریس کوٹری اسٹیشن پر موجود ہیں۔
ٹنڈوجام کے ریلوے ٹریک پر دوپہر ساڑھے بارہ بجے کے قریب دھماکا ہوا تھا۔ حادثے سے ٹرین سروس معطل ہوگئی تھی، ریلوے ٹریک کو بحال کرنے کے لئے تاحال کام جاری ہے۔
