ریاض: سعودی عرب سمیت خلیجی ممالک میں رمضان المبارک کا چاند نظر آنے کے بعد پہلی نمازِ تراویح کی ادا کی جارہی ہے۔
تفصیلات کے مطابق پاکستان دنیا کے کئی ممالک میں رمضان المبارک کا چاند نظر آتے ہی ماہ صیام کا آغاز ہوگیا، امسال بھی مسلمانوں کی بڑی تعداد نے مذہبی جوش و جذبے کے ساتھ ماہ صیام کو خوش آمدید کہا اور اس عزم کا اعادہ کیا کہ وہ بابرکت مہینے میں اللہ رب العزت کی رحمتیں سمیٹیں گے۔
رمضان المبارک کا آغاز ہوتے ہی مساجد میں پہلی تراویح کا اہتمام کیا گیا، مکہ مکرمۃ کی مسجد الحرام میں مسلمانوں کی کثیر تعداد نے پہلی نمازِ تراویح میں شرکت کی۔ اسی طرح مسجد نبوی میں بھی مدینے کے رہائشیوں کی بڑی تعداد نے صلوۃ التراویح کی نماز ادا کی۔
مسجد الحرام میں نماز تروایح کا سب سے بڑا اجتماع ہوا جس میں مقامی افراد کے علاوہ دنیا بھر سے ہزاروں مسلمان نماز ادا کی اور قرآن مجید کی تلاوت سماعت کی۔
واضح رہے کہ پاکستان سمیت دنیا کے مختلف ممالک خصوصاً سعودی عرب میں ماہ رمضان 1439 ہجری کا چاند نظر آیا جس کے بعد ان ممالک میں کل پہلا روزہ جبکہ آج نمازِ عشاء کے بعد پہلی تراویح ادا کی جارہی ہے۔
مزید پڑھیں: رمضان چاند، مسجدالحرام اور مسجد نبوی میں نماز تراویح کا شیڈول، کون کب امامت کرے گا؟
خیال رہے کہ مسجد الحرام میں ہر سال کی طرح امسال بھی نماز تروایح کا اہتمام کیا گیا جس میں امامت کے فرائض مختلف شیوخ انجام دیں گے، اس ضمن انتظامیہ کی جانب سے باقاعدہ شیڈول جاری کیا گیا ہے۔
مسجد الحرام اور مسجد نبوی میں ماہ صیام کاچاند نظر آنے کے بعد سے 20 تاریخ تک مختلف شیوخ امامت کے فرائض انجام دیں گے، 20 رکعات تراویح میں دو امام اپنے فرائض سرانجام دیں گے، پہلے امام دس رکعت جبکہ بعد میں آنے والے امام دس رکعت تراویح اور وتر پڑھائیں گے۔
مسجد الحرام میں پہلے روز ابتدائی 10 رکعات شیخ بلیلا جبکہ اگلی دس رکعات شیخ عبدالرحمان سدیس پڑھائیں گے اسی طرح دوسرے روز امامت کے فرائض شیخ یاسر دوسارے اور شیخ مہیر انجام دیں گے۔
