ڈیرہ اسماعیل خان: خیبرپختونخوا کے علاقے ڈی آئی خان میں نامعلوم افراد کی فائرنگ سے تین افراد جاں بحق ہوگئے، لواحقین نے مقتولین کی میتیں پروا کے مقام پر رکھ کر شدید احتجاج کیا۔
تفصیلات کے مطابق خیبرپختونخوا کے علاقے ڈیرہ اسماعیل خان میں موجود پروآ کے مقام پر موجود گونسرہ نہر کے کنارے پر بیٹھے تین افراد پر نامعلوم افراد نے فائرنگ کی۔
فائرنگ کے بعد علاقہ مکینوں نے زخمیوں کو پروا اسپتال منتقل کیا تاہم تینوں زخموں کی تاب نہ لاتے ہوئے جاں بحق ہوگئے، پولیس کو واقعے کی اطلاع ملی تو بھاری نفری جائے وقوعہ اور اسپتال پہنچی۔
پڑھیں: ’’ پولیس وین پرفائرنگ، 4 اہلکار شہید، فوٹیجز منظرعام پر ‘‘
تینوں افراد کے جاں ہونے کی اطلاع کے بعد مشتعل لواحقین سڑکوں پر نکل آئے اور میتوں کو انڈس ہائی وے پر رکھ کر انتظامیہ اور پولیس کے خلاف شدید احتجاج کرتے ہوئے نعرے بازی کی جس کے باعث ہائی وے کو ٹریفک کی آمد ورفت کے لیے بند کردیا گیا تھا۔
پولیس افسران نے مظاہرین سے مذاکرات کیے اور قاتلوں کی گرفتاری کی یقین دہانی کرواتے ہوئے ملحقہ علاقوں میں سیکیورٹی سخت کردی، کامیاب مذاکرات کے بعد مظاہرین نے مظاہرہ ختم کر کے میتوں کی تدفین کردی۔
