اسلام آباد: طارق فاطمی سے خارجہ امور کا قلم دان پاکستان پیپلز پارٹی کے تحفظات پر واپس لیا گیا ہے۔
ذرائع کے مطابق طارق فاطمی کو پیپلز پارٹی کے تحفظات پر عہدے سے ہٹا دیا گیا، پیپلز پارٹی نے ن لیگ کو طارق فاطمی پر تحفظات سے متعلق آگاہ کیا تھا۔
ذرائع کا کہنا ہے کہ پی پی نے حکومت کو مشورہ دیا ہے کہ متنازع شخصیات کی تعیناتیوں سے گریز کیا جائے، نیز وزارت خارجہ پی پی کو ملنے کے بعد طارق فاطمی کی تقرری نامناسب ہے۔
اس سلسلے میں سیکریٹری جنرل پیپلز پارٹی نیر بخاری نے اے آر وائی نیوز سے گفتگو کرتے ہوئے کہا طارق فاطمی کی تعیناتی جیسے اقدامات سے حکومتی اتحاد متاثر ہوگا، ان کی تعیناتی سے قبل اتحادیوں کو اعتماد میں لینا چاہیے تھا۔
طارق فاطمی سے مشیر برائے خارجہ امور کا عہدہ واپس لے لیا گیا
نیر بخاری نے کہا حکومت نے وزیر خارجہ کا عہدہ پی پی کو دینے کی یقین کرائی تھی، بلاول بھٹو، حنا ربانی کھر کے بعد طارق فاطمی کی تعیناتی سمجھ سے بالاتر ہے، وزیر اعظم کو ایسے فیصلے لینے سے پہلے مشاورت کرنی چاہیے۔
واضح رہے کہ وزیر اعظم شہباز شریف نے طارق فاطمی سے خارجہ امور کا قلمدان واپس لے لیا ہے، تاہم طارق فاطمی معاون خصوصی برقرار رہیں گے، ان سے صرف خارجہ امور کی ذمہ داری واپس لی گئی ہے۔
نوٹفکیشن کے مطابق معاون خصوصی طارق فاطمی کو وزیر مملکت کا عہدہ بھی دے دیا گیا ہے، پہلے جاری نوٹیفکیشن میں طارق فاطمی کو وزیر مملکت کا عہدہ نہیں دیا گیا تھا، انھیں وزیر مملکت کے برابر مراعات ملیں گی۔
یاد رہے کہ وزیر اعظم شہباز شریف نے گزشتہ روز طارق فاطمی کو معاون خصوصی خارجہ امور تعینات کیا تھا۔
