کراچی : پھول ہماری زندگی میں بہت اہمیت کے حامل ہیں، شادی بیاہ کی تقریبات ہوں، کسی کو مبارکباد دینی ہو یا کوئی عزیز انتقال کرجائے، ان مواقعوں پر پھولوں کا استعمال لازمی سمجھا جاتا ہے۔
اس حوالے سے پھولوں کا استعمال مزید بڑھتا جارہا ہے جس کا فائدہ دیگر شعبوں کی طرح پھولوں کی تجارت سے وابستہ افراد کو بھی ہورہا ہے۔
تین ہٹی کے پل کے نیچے کراچی کی وہ پھول مارکیٹ قائم ہے جہاں دنیا بھر کے منفرد اور حسین پھولوں کا کاروبار کیا جاتا ہے۔
کراچی میں تین ہٹی کی ہول سیل مارکیٹ میں جہاں پھولوں کی قیمت 300 سے 500 جبکہ ریٹیل میں گلدستے مختلف قیمتوں میں ڈیزائن کے حساب سے فروخت کیے جاتے ہیں۔
مہکتے ہوئے خوش رنگ پھول کسے اچھے نہیں لگتے۔ پھولوں کے ہار ہوں یا پھر گلدستے، گجرے، دلہا دلہن کے سہرے، دولہا کی گاڑی سجانی ہو یا کنگن یہاں سب کچھ موجود ہے۔
اس حوالے سے نمائندہ اے آر وائی سید عمر ندیم سے گفتگو کرتے ہوئے عصمت نامی دکاندار نے تین ہٹی پر مارکیٹ کے قیام سے متعلق بتایا کہ اس مارکیٹ کو قائم ہوئے 45 سال کا عرصہ گزر چکا ہے۔
انہوں نے بتایا کہ شروع میں تو یہاں چند دکانیں ہوا کرتی تھیں لیکن آہستہ آہستہ اس میں اضافہ ہوتا گیا اور آج جگہ یہ مکمل مارکیٹ کی شکل اختیار کرچکی ہے۔
تین ہٹی پھول مارکیٹ میں مختلف اقسام کے پھول سب کو اپنی جانب متوجہ کرتے ہیں مگر سب سے زیادہ گلاب پسند کیا جاتا ہے جس کی مختلف اقسام ہر دلعزیز ہیں۔
