واشنگٹن: امریکا میں دل دہلا دینے والا واقعہ پیش آیا، درندہ صفت بیٹے نے مبینہ طور پر ماں اور اپنے بھائی کو فائرنگ کرکے موت کے گھاٹ اتار دیا جبکہ اس دوران باپ شدید زخمی ہوگیا۔
غیرملکی خبررساں ادارے کی رپورٹ کے مطابق یہ واقعہ امریکی ریاست ورجینیا میں پیش آیا، جہاں نابالغ بیٹے نے اپنی ماں اور 6 سالہ بھائی کو فائرنگ کرکے قتل کردیا اور موقع سے راہ فرار اختیار کرلی۔
ورجینیا پولیس نے 17 سالہ ’ہینری‘ نامی مبینہ قاتل کو مسلح اور خطرناک قرار دے دیا۔ سماجی رابطے کی ویب سائٹ فیس بک پر پولیس نے شہریوں کو خطرے سے آگاہ کرتے ہوئے اپیل کی کہ جو بھی شخص مبینہ قاتل کو دیکھے تو فوری طور پر پولیس کو آگاہ کرے تاکہ اس کی گرفتاری عمل میں لائی جاسکے۔
پولیس کا کہنا ہے کہ اس واقعے کے دوران باپ گھر پہنچا تو قاتل بیٹے نے اس پر بھی فائرنگ کی بوچھاڑ کردی جس کے نتیجے میں وہ زخمی ہوا۔ بعد ازاں سیکیورٹی اہلکار جائے وقوعہ پر پہنچے اور گھر کی تلاشی لینا شروع کی تاہم اس وقت تک قاتل فرار ہوچکا تھا۔ متعلقہ ادارے نے علاقہ مکینوں سے اپیل کی ہے کہ وہ محتاط رہیں۔
حکام کا کہنا ہے کہ واقعے کی اصل وجہ لڑکے کی گرفتاری کے بعد ہی سامنے آئے گی۔