میکسیکو کی خاتون باکسر مونٹریال میں مقابلے کے دوران زور دار پنچ لگنے سے زندگی کی بازی ہار گئیں۔
غیرملکی خبررساں ادارے کی رپورٹ کے مطابق میکسیکن خاتون باکسر جینیٹ زکریا زپاٹا مونٹریال میں مقابلے کے پانچ روز بعد زندگی کی بازی ہارگئیں، باؤٹ کے دوران 18 سالہ باکسر بری طرح زخمی ہوگئی تھیں۔
فائٹ کے پروموٹر یوون مشیل نے ایک بیان میں خاتون باکسر کی انتقال کی تصدیق کرتے ہوئے بتایا کہ یہ انتہائی دکھ کے ساتھ بتانا پڑرہا ہے کہ ان کے خاندان کے افراد نے بتایا کہ جینیٹ زکریا آج سہ پہر چل بسیں۔
مونٹریال میں کینیڈین باکسر سے مقابلے میں وہ زخمی ہوگئی تھیں، چوتھے راؤنڈ میں زور دار پنچ لگنے کے بعد وہ رنگ میں گر گئی تھیں۔
¡Oremos 🙏🏻 por nuestra paisana Jeanette Zacarías Zapata que se encuentra en condición MUY grave!#boxeo #boxing #tragedia #boxeadorea #npjboxeo pic.twitter.com/UgIGUdcxX7
— No Puedes Jugar Boxeo (@NPJBoxeo) August 29, 2021
خاتون باکسر کو فوری طبی امداد کے لیے اسپتال منتقل کیا گیا تھا تاہم پانچ روز بعد تک وہ زندگی کی جنگ لڑتی رہیں اور جانبر نہ ہوسکیں۔
میکسیکن باکسر کی موت پر حریف کینیڈین باکسر نے بھی دکھ اور افسوس کا اظہار کیا ہے۔
سی بی سی کی رپورٹ کے مطابق میکسیکن باکسر نے مونٹریال میں فائٹ کی اجازت حاصل کرنے کے لیے کافی محنت کی تھی کیونکہ وہ میکسیکو میں گزشتہ مئی میں ایک مقابلے میں ناک آؤٹ ہوگئی تھیں۔