فیصل آباد میں مبینہ طور پر ڈاکٹروں کی غفلت سے 17 سالہ نوجوان لڑکی جاں بحق ہوگئی۔
اے آر وائی نیوز کے مطابق گزشتہ روز فیصل آباد میں ایک 17 سالہ نوجوان لڑکی علاج کے دوران ڈاکٹروں کی مبینہ غفلت کے باعث دم توڑ گئی۔
فیصل آباد کے علاقے غلام محمد آباد کی رہائشی 17 سالہ لڑکی آفرین کو پیٹ میں انفیکشن کے باعث جنرل اسپتال لایا گیا۔
سوگوار خاندان نے دعویٰ کیا کہ ڈاکٹروں نے اس کے علاج سے انکار کیا اور وہ موبائل فون استعمال کرنے میں مصروف تھے جس کے نتیجے میں اس کی موت واقع ہوئی۔
فیصل آباد جنرل اسپتال کے میڈیکل سپرنٹنڈنٹ (ایم ایس) ڈاکٹر سلمان نے ڈاکٹروں کی غفلت کا اعتراف کرتے ہوئے نوعمر لڑکی کی موت کی انکوائری شروع کر دی۔
پولیس نے ڈیوٹی ڈاکٹروں کو گرفتار کر کے تھانہ غلام محمد منتقل کر دیا ہے۔
وزیر اعلیٰ پنجاب حمزہ شہباز شریف نے بھی واقعہ کا نوٹس لیتے ہوئے سیکرٹری محکمہ صحت سے رپورٹ طلب کر لی۔
