لندن : نوجوانوں کے گروہ نے سگریٹ فروخت نہ کرنے پر ہندوستانی دکاندار کو قتل کردیا، پولیس نے ایک ملزم کو گرفتار کرلیا ہے۔
تفصیلات کے مطابق قتل کی تحقیقات کرنے والی اسکارٹ لینڈ یارڈ کی ٹیم نے گزشتہ شب ایک 16 سالہ نوجوان کو ہندوستانی دکاندار کو قتل کرنے کے الزام میں گرفتار کر عدالت میں پیش کردیا۔
اسکاٹ لینڈ یارڈ کے حکام نے عدالت میں بتایا کہ 49 سالہ وجے پٹیل کو ان کی دکان واقع مل ہل کے باہر نوجوانوں کے گروہ نے محض اس وجہ سے قتل کردیا کیوں اُس نے نوجوانوں کو سگریٹ دینے سے منع کردیا تھا۔
وجے پٹیل نے نوجوانوں کو کہا کہ تم لوگوں کی عمر 16 سال سے کم ہے اس لیے قانوناً تمباکو نوشی یا دیگر نشہ آور چیزیں میں آپ کو فروخت نہیں کرسکتا تاہم نوجوان بہ ضد تھے کہ اُن کی عمر 18 سال ہے اس لیے انہیں تمباکو پیپرز فروخت کی جائے۔
میٹ پولیس کے ترجمان نے میڈیا سے گفتگو کرتے ہوئے بتایا کہ قتل میں ملوث دیگر تین ملزمان کی تلاش جاری ہے جنہیں گرفتار ملزم سے کی گئی تفتیش کی روشنی میں جلد گرفتار کرلیا جائے گا۔
خیال رہے کہ دو بچوں کے والد وجے پٹیل کو ہفتے کی شب زخمی کیا گیا تھا جنہیں شدید زخمی حالت میں اسپتال منتقل کیا گیا تھا جہاں وہ زخموں کی تاب نہ لاتے ہوئے پیر کے روز خالق حقیقی کے پاس بسے۔
وجے پٹیل اپنی دکان کے قریب واقع ایک ہاسٹل میں رہائش پذیر تھے اور وہ 2006 میں اپنے اہل خانہ کو بہتر اور خوشحال مستقبل دینے کے لیے بھارت سے برطانیہ منتقل ہوئے تھے۔
