نئی دہلی : ٹینس اسٹار سربیا کے نوواک جوکووچ نے اپنا لوہا ایک بار پھر منوا لیا، عالمی درجہ بندی میں پہلے نمبر پر برقرار بیں، فرنچ اوپن کے فائنل میں شکست کے باوجود رینکنگ میں کمی نہیں آئی۔
فرنچ اوپن کے فائنل میں اسپین کے رافیل نڈال سے ٹائٹل میچ میں شکست کے باوجود سربیا کے نوواک جوکووچ عالمی درجہ بندی میں پہلے نمبر پر برقرار ہیں جبکہ 13 ویں بار ٹائٹل جیتنے والے نڈال دوسرے نمبر پر ہیں۔
33سالہ جوکووچ کے عالمی درجہ بندی میں11740 پوائنٹس ہیں اور انہیں فرنچ اوپن کے فائنل میں پہنچنے کا فائدہ480 پوائنٹس کے اضافے کی شکل میں ہوا۔ اس سال جوکووچ کی یہ دوسری شکست تھی اور اس کا 18 واں گرینڈ سلم جیتنے کا خواب نڈال سے ٹکراکر ٹوٹ گیا۔
رولن گیرو کے کلے کورٹ پر اپنی 100 ویں جیت کے ساتھ 13 واں ٹائٹل جیتنے والے رافیل نڈال نے سوئٹزر لینڈ کے راجر فیڈرر کے 20 گرینڈ سلم ٹائٹل کا عالمی ریکارڈ کی برابری کرلی اور درجہ بندی میں دوسرے مقام پر پہنچ گئے ہیں۔
دفاعی چیمپیئن ہونے کی وجہ سے نڈال کو اس بار ٹائٹل بچانے کے باوجود کوئی پوائنٹس نہیں ملا، جوکووچ اور نڈال کے درمیان فاصلہ اب 1890 تک جا پہنچا ہے۔
اس کے علاوہ عالمی درجہ بندی میں آسٹریا کے ڈومینک تھیام تیسرے اور ٹورنامنٹ سے باہر رہنے والے راجر فیڈرر چوتھے نمبر پر ہیں۔
سیمی فائنل میں جوکووچ سے ہارنے والے یونان کے اسٹیفانوس ستسپاس ایک مقام کے فائدے کے ساتھ پانچویں نمبر پر پہنچ گئے جبکہ سیمی فائنل میں نڈال سے شکست کھانے والے ارجنٹینا کے ڈیاگو شوارٹزمین ٹاپ 10 میں داخل ہوگئے۔ شوارٹزمین چھ مقام کی چھلانگ لگا کر آٹھواں نمبر پر آگئے۔
