ٹیکساس: امریکی ریاست ٹیکساس میں بیچ سڑک پر بنے مین ہول میں گرنے والی خاتون کو کئی روز بعد زندہ ریسکیو کرلیا گیا۔
غیرملکی خبررساں ادارے کی رپورٹ کے مطابق یہ واقعہ نارتھ گرینڈ پارک وے کے علاقے میں پیش آیا جہاں مصروف سڑک کے بیچوں بیچ بنے مین ہول میں راہگیر خاتون جاگریں تھیں۔
پولیس کا کہنا ہے کہ اطلاع ملنے پر ریسکیو ٹیمیں جائے وقوعہ پر پہنچیں اور امدادی کارروائیاں کرتے ہوئے خاتون کو مین ہول سے باہر نکال لیا گیا۔
پولیس کے مطابق خاتون کئی روز سے مین ہول میں پھنسی ہوئی تھیں تاہم معجزانہ طور پر انہیں کوئی خراچ تک نہیں آئی اور جب انہیں باہر نکالا گیا تو وہ ٹھیک سے سانس لے رہی تھیں۔
مقامی پولیس کا کہنا ہے کہ یہ واضح نہیں ہوسکا ہے کہ خاتون کس طرح مین ہول میں گریں اور وہ اس علاقے میں کس لیے آئی تھیں کیونکہ یہ تعمیراتی علاقہ ہے۔
پولیس نے فوری طور پر خاتون کی شناخت ظاہر نہیں کی اور اس سے متعلق کوئی ذاتی معلومات میڈیا سے شیئر نہیں کی گئیں، پولیس نے میڈیا کو صرف اتنا بتایا ہے کہ ایک نامعلوم خاتون کو مین ہول سے کئی روز بعد زندہ نکال لیا گیا ہے۔