بینکاک: تھائی لینڈ کے غار میں گزشتہ دو ہفتوں سے پھنسے تمام 12 بچوں اور ان کے کوچ کو باحفاظت باہر نکال لیا گیا ہے۔
غیر ملکی خبر رساں ادارے کے مطابق چھ بچوں کو گزشتہ روز ہی غار سے نکال لیا گیا تھا جبکہ باقی چھ بچوں اور ان کے کوچ کو نکالنے کے بعد یہ خطرناک آپریشن پایہ تکمیل کو پہنچ گیا ہے۔
تمام بچوں اور کوچ کو غار سے نکالنے کا اعلان تھائی لینڈ کی بحریہ کے کمانڈوز نے کیا جو اس آپریشن میں شروع سے ہی شریک رہے، جاری ہونے والے بیان میں بتایا گیا ہے کہ تمام بچے اور کوچ محفوظ ہیں۔
اس سے قبل آٹھ بچوں کو اتوار اور پیر کے روز غار سے نکال لیا گیا تھا جو اس وقت اسپتال میں زیر علاج ہیں، تھائی حکام کا کہنا ہے کہ گزشتہ دو دنوں کے دوران بچائے جانے والے بچوں کو ذہنی اور جسمانی صحت اچھی ہے۔
حکام کے مطابق ان آٹھ بچوں کے خون کے نموں کا معائنہ کیا گیا ہے اور ان کے ایکسرے لیے گئے ہیں دو بچوں کے پھیپھڑوں کی سوزش کا شبہ ظاہر کیا گیا ہے اور ان کا علاج جاری ہے۔
صحت عامہ کی وزارت کے مستقل سیکریٹری جیسادا چوکے دومرونگسنگ نے میڈیا کو بتایا کہ تمام بچے اچھی صحت میں ہیں، کسی کو بخار نہیں ہے، سب اچھی ذہنی حالت میں ہیں۔
خیال رہے کہ 12 بچوں اور ان کے فٹبال کوچ کی یہ ٹیم 23 جون کو غار میں پانی بھر جانے کے سبب پھنس گئی تھی، گزشتہ ہفتے غوطہ خوروں نے ان کا پتہ چلایا تھا۔