نئی دہلی : بھارتی سیاسی جماعت ترنمول کانگریس کی رکن اسمبلی نصرت جہاں نے کہا ہے کہ بی جے پی کورونا سے بڑا وائرس ہے، اگر یہ اقتدار میں آئی تو مسلمانوں کی الٹی گنتی شروع ہوجائے گی۔
بھارتی ریاست مغربی بنگال میں انتخاب کے پیش نظر تمام جماعتوں نے ایک دوسرے پر الزام تراشی کا سلسلہ تیز کردیا ہے، اس سلسلے میں بھارتی کانگریس کی رہنما نے بی جے پی کو کورونا سے زیادہ خطرناک قرار دے دیا۔
ترنمول کانگریس رکن پارلیمنٹ نصرت جہاں نے انتخابی مہم کے دوران اپنے بیان میں کہا کہ آپ لوگ اپنی آنکھ کان کھول کر رکھیے۔ بی جے پی جیسا خطرناک وائرس گھوم رہا ہے۔
رکن پارلیمنٹ نصرت جہاں نے ایک جلسہ کے دوران بی جے پی کوکورونا وائرس سے بھی زیادہ خطرناک وائرس ٹھہرایا اور کہا کہ اگر بی جے پی مغربی بنگال میں برسراقتدار آتی ہے تو مسلمانوں کی الٹی گنتی شروع ہو جائے گی۔
اپنے بیان میں انہوں نے مزید کہا کہ یہ پارٹی مذاہب کے درمیان تفریق پیدا کرتی ہے اور لوگوں کے درمیان فساد کراتی ہے۔
