واشنگٹن : امریکا کی گریویٹی نامی کمپنی کے سی ای او نے اپنی تنخواہ میں کمی کرکے تمام ملازمین کی تنخواہ 70 ہزار ڈالر کردی۔
اکثر باسز کو شکوہ ہوتا ہے کہ ملازمین کام کو غیر دلچسپی سے کرتے ہیں جبکہ بعض دفعہ وہ ملازمت چھوڑ کر ان اداروں میں بھی چلے جاتے ہیں جن سے کاروباری مسابقت ہوتی ہے۔
دراصل ملازمین انہی اداروں میں دل لگا کر اور محنت سے کام کرتے ہیں جہاں انہیں ان کا مطلوبہ ماحول اور تمام سہولیات ملیں اور ان کی قدر کی جاتی ہو، ملازمین کی قدر کرنے والا امریکی کمپنی گریویٹی پیمنٹس کا سی ای او ڈین پرائس ہے جس نے اپنی تنخواہ کم کرکے ملازمین کی تنخواہ میں کئی گناہ اضافہ کردیا۔
غیر ملکی میڈیا کی رپورٹس کے مطابق ڈین پرائس کو 2015 میں اپنی کمپنی کی ایک خاتون ملازم سے بات کرنے کا موقع ملا تو انہیں پتہ چلا کہ 40 ہزار ڈالر ماہانہ تنخواہ کے باوجود ان کا گزارا مشکل سے ہورہا ہے کیونکہ سیئٹل میں رہائش بہت مہنگی ہے۔
مذکورہ خاتون مہنگائی کے باعث اپنے بچوں کی بہتر انداز میں کفالت نہیں کرپارہی تھی اور قرضے میں دھنستی جارہی تھی، اسی لیے ڈین پرائش نے فیصلہ کیا کہ اپنی تنخواہ(جو لاکھوں ڈالرز میں تھی) میں کمی کرکے اپنے تمام ملازمین کی کم از کم تنخواہ 70 ہزار ڈالر مقرر کردی۔
سی ای او کے اس اقدام پر دو سینئر ملازموں نے یہ کہتے ہوئے استعفیٰ کہ اس سے ملازمین میں بے فکری اور نااہلی پیدا ہوگی اور کمپنی کو نقصان ہوگا جبکہ دوسری کمپنیوں نے تنقید کا نشانہ بنایا لیکن ڈین پرائس نے کسی کی پروا نہیں کی۔
ملازمین کی تنخواہوں میں اضافے کے بعد 10 فیصد ملازم سیئٹیل جیسے مہنگے علاقے میں اپنا گھر بنانے میں کامیاب ہوئے جبکہ کمپنی کو بھی پہلے کی نسبت بہت فائدہ ہونے لگا کیونکہ تمام ملازمین زیادہ لگن اور محنت سے کام شروع کردیا اور کچھ ملازمین نے دفتر کے قریب رہائش اختیار کرلی تاکہ دفتر میں زیادہ وقت دے سکیں۔
