کراچی: کروناوائرس سے بچاؤ اور آگاہی سے متعلق وفاقی محکمہ صحت کے مزید اقدامات سامنے آگئے، پاکستان کے 7بین الاقوامی ایئرپورٹس پر فوکل پرسن تعینات کر دیئے گئے۔
تفصیلات کے مطابق تعیناتی کا نوٹیفکیشن سینٹرل ہیلتھ اسٹیبلشمنٹ ڈائریکٹوریٹ نے جاری کردیا۔ نوٹیفکیشن میں کہا گیا ہے کہ ایئرپورٹس ہیلتھ افسران کرووناوائس کے فوکل پرسنز ہوں گے، اسلام آباد ایئرپورٹ پر ڈاکٹر سارہ سعید کو فوکل پرسن مقرر کردیا گیا۔ محکمہ صحت نے مزید اقدامات کی یقین دہانی کرادی۔
جاری کردہ نوٹیفکیشن کے مطابق کراچی ایئرپورٹ پر ڈاکٹر طارق نواز فوکل پرسن مقرر کی گئی ہیں۔ جبکہ علامہ اقبال، ملتان، فیصل آباد اور سیالکوٹ کے لیے ڈاکٹر امینہ ثاقب فوکل پر سن تعینات کردی گئیں۔
کروناوائرس کی پاکستان منتقلی کا خدشہ، حفاظتی اقدامات
باچاخان ایئرپورٹ کے لیے کشمالہ اورکزئی فوکل پرسن ہوں گی۔
خیال رہے کہ پاکستان میں باچاخان ایئرپورٹ پر خلیجی ممالک سے آئی پروازوں کے مسافروں کو ہیلتھ کاؤنٹر سے گزرا جارہا ہے، ہیلتھ کاؤنٹر پر محکمہ صحت کی جانب سے ڈاکٹر اور پیرا میڈیکل اسٹاف دن رات موجود ہیں۔
خلیجی ممالک سے آئے مسافروں کی تھرمل باڈی اسکینر اور تھرمامیٹر سے اسکریننگ کی جارہی ہے۔ مسافر کو وائرس کی تشخیص پر باچاخان ایئرپورٹ پر مخصوص کمرے میں رکھا جائے گا۔ خیال رہے کہ تھرمل اسکینر مسافروں کے اضافی درجہ حرارت کی پیمائش کرتا ہے۔
