مریخ پر بھیجا جانے والا مشن ونڈوز 98 کے اپ ڈیٹ نہ ہونے کی وجہ سے خطرے کا شکار ہوگیا، مشن میں فوری طور پر ونڈوز کو اپ ڈیٹ کرنے کی ضرورت ہے۔
بین الاقوامی میڈیا کے مطابق یورپین خلائی ایجنسی کی جانب سے 19 سال قبل مریخ پر بھیجا گیا مشن مائیکرو سافٹ ونڈوز کی وجہ سے خطرے سے دو چار ہوگیا ہے۔
آج سے 27 سال قبل 14 جولائی 1995 میں جب امریکا کی ایک ٹیکنالوجی کمپنی مائیکرو سافٹ نے کمپوٹرکے لیے ونڈوز 95 کے نام سے ایک جدید آپریٹنگ سٹم متعارف کروایا تو اس وقت کسی کے وہم و گمان میں بھی نہیں تھا کہ یہی ونڈوز آگے چل کر ٹیکنالوجی کے میدان میں ایک طوفان برپا کردے گی۔
آج ٹیکنالوجی میں ہونے والی زیادہ تر پیش رفت اسی ونڈوز کے مرہون منت ہے جس نے کمپیوٹر کو دنیا کے کونے کونے میں فروغ دیا۔
گزشتہ سال اکتوبر میں مائیکرو سافٹ کی جانب سے ونڈوز آپریٹنگ سسٹم کا جدید ترین ورژن ونڈوز 11 کے نام سے متعارف کروایا گیا جو کہ اب دنیا کے بیشتر ممالک میں استعمال کیا جا رہا ہے۔
لیکن اگر ٹیکنالوجی کی اس دوڑ میں اگر ونڈوز 98 کو اپ ڈیٹ کرنے کا کہا جائے تو یقیناً آپ اسے مذاق سمجھیں گے۔
لیکن یورپین خلائی ایجنسی (ای ایس اے) کے لیے یہ زندگی اورموت کا معاملہ بن چکا ہے کیوں کہ انہیں زمین سے 200 ملین کلو میٹر کے فاصلے پر مریخ کے مدار میں چکر لگانے والے خلائی جہاز میں ونڈوز 98 کو ہر حال میں اپ ڈیٹ کرنا ہے۔
ای ایس اے کے مارس ایکسپریس مشن کی جانب سے مارسس نامی خلائی جہاز کو تقریباً 19 سال قبل مارس کے گرد بھیجا گیا تھا اوراب اس کے لیے چند اہم اپ ڈیٹس ناگزیر ہوگئی ہیں۔
اس حوالے سے ای ایس اے کا کہنا ہے کہ مارسس کو بھیجنے کا مقصد سرخ سیارے پر پانی کی تلاش کرنا ہے اور رواں سال ونڈوز 98 میں ہونے والی اپڈیٹ کے بعد اس کی تلاش میں تیزی آجائے گی۔
اس اپ ڈیٹ کے بعد مارسسِ کے پروبس مریخ کی سطح کے نیچے اوراس کے چاند فوبوس کو زیادہ بہتر طریقے سے کھنگال سکیں گے۔
اس مشن کو 2003 میں شروع کیا گیا تھا تاکہ زمین کے پڑوسی سیارے کے ماضی، حال اور مستقبل کے بارے میں زیادہ بہتر طریقے سے سمجھا جاسکے۔
جس وقت اس خلائی جہاز کو ڈیزائن کیا گیا اس وقت تک آپریٹنگ سسٹمز کی دنیا میں ونڈوز 98 کا راج تھا اور مارسز کو مائیکرو سافٹ ونڈوز 98 کی بنیاد پر بننے والا ڈیولپمنٹ انوائرمنٹ استعمال کرتے ہوئے ڈیزائن کیا گیا تھا۔
مارس ایکسپریس مشن کی ٹیم کا کہنا ہے کہ مارسس کی کارکردگی میں اضافے کے لیے ہمیں متعدد چیلنجزکا سامنا ہے، اور ان سے نمٹے کا ایک ہی حل ہے کہ انسٹرومنٹس کو ونڈوز 98 سے یورپین اسپیس ایجنسی کے ڈیزائن کردہ مارس 2022 سافٹ ویئر پر اپ گریڈ کردیا جائے۔
اس نئے سافٹ ویئر میں اپ گریڈز کی ایک مکمل سیریز ہے جن کی بدولت سگنل وصول کرنے، آن بورڈ ڈیٹا پراسیسنگ اور زمین پر بھیجے جانے والے سائنسی ڈیٹا کے معیار اور مقدار کو بہتر بنانا ہے۔
