تازہ ترین

حکومت کا ججز کے خط پر انکوائری کمیشن بنانے کا اعلان

اسلام آباد: وفاقی حکومت نے اسلام آباد ہائی کورٹ...

فوجی عدالتوں سے 15 سے 20 ملزمان کے رہا ہونے کا امکان

اسلام آباد : اٹارنی جنرل نے فوجی عدالتوں سے...

شاہین نے آفریدی کا جرسی نمبر کیوں لیا؟ جانئے دلچسپ کہانی

آپ نے اکثر دیکھا ہوگا کہ کرکٹرز کی شرٹ کے پیچھے نام کے ساتھ ہندسے بھی موجود ہوتے ہیں جو ذہنوں میں سوال بھی پیدا کرتے ہیں کہ آخر اُن ہندسوں کا مقصد اور مطلب ہوتا ہے؟ آج ہم آپ کو بتائیں گے کہ کھلاڑیوں کی شرٹس کے پیچھے نمبرز کی کہانی کا راز کیا ہے؟۔

پاکستان کرکٹ بورڈ کی جانب سے جاری ویڈیو میں کپتان بابر اعظم، محمد رضوان، شعیب ملک، فخر زمان، شاہین آفریدی، آصف علی اور شاداب خان نے اپنے ٹی شرٹ نمبرز کے رازوں سے پردہ اٹھایا۔

بابراعظم

قومی کرکٹ ٹیم کے کپتان بابراعظم نے اپنی ٹی شرٹ کے نمبر سے متعلق بتایا کہ میری شرٹ نمبر 56 کے پیچھے کوئی راز نہیں، مجھے پہلے جرسی نمبر 33 الاٹ کیا گیا، بعد ازاں 56 دیا گیا تو میں نے رکھ لیا۔

بابراعظم نے بتایا کہ پہلے اس نمبر کی زیادہ اہمیت نہیں تھی لیکن اب یہ میرے کرکٹ کے ہم سفر ہے، کوشش ہوتی ہے کہ اسی نمبر کے مطابق اسکور کروں، اسی نمبر کے تعلق کی بنیاد پر ایک برانڈ بھی متعارف کرانے جارہا ہوں۔

محمد رضوان

وکٹ کیپر بیٹسمین محمد رضوان نے جرسی پر کندہ 16 نمبر سے متعلق انکشاف کیا کہ جب ہارڈ بال کھیلنے کے لئے گیا تو اپنی پہلی اننگز میں 16 رنز بناکر آؤٹ ہوگیا تھا، اب یہ نمبر میرے لئے لکی بن چکا ہے۔رضوان نے بتایا کہ میری تاریخ پیدائش میں بھی چھ آتا ہے، بیگم کی تاریخ پیدائش میں بھی 6 جبکہ دونوں بیٹیوں کی تاریخ پیدائش میں بھی 6 کا ہندسہ شامل ہے، یہی وجہ ہے کہ 16 نمبر کا انتخاب کیا۔

شاہین آفریدی

فاسٹ بولر شاہین آفریدی نے اپنے 10 نمبر کے ٹی شرٹ کی کہانی بیان کرتے ہوئے کہا کہ پہلے شرٹ کا نمبر 40 تھا لیکن میں چاہتا تھا کہ 10 نمبر مجھے ملے کیوں کہ لالہ (شاہد آفریدی) یہ نمبر استعمال کرتے ہیں اور وہ بچپن سے میرے فیورٹ ہیں میری خواہش تھی کہ مجھے 10 نمبر ملے اور آفریدی نام اس پر لکھا ہو۔

شاہین آفریدی نے بتایا کہ 2018 میں پی سی بی سے درخواست کی تھی کہ 10 نمبر مجھے دیا جائے لیکن اس وقت شاہد آفریدی ریٹائر نہیں ہوئے تھے لیکن اب ورلڈ کپ کیلئے یہ مجھے مل گیا ہے اور شاہد آفریدی نے بھی کہا کہ اب شاہین یہ پہن سکتا ہے شکریہ لالہ۔قومی ٹیم کے فاسٹ بولر کا کہنا تھا کہ 10 نمبر کی جرسی پہن کر میدان میں جانا باعث فخر سمجھتا ہوں کیونکہ یہ لالہ کے بعد میری پہنچان بن گئی ہے۔

فخر زمان

پاکستان کرکٹ ٹیم کے اوپننگ بلے باز فخر زمان نے اپنی ٹی شرٹ سے متعلق بتایا کہ پہلے جب ڈومیسٹک کرکٹ کھیلتے تھے تو مختلف نمبر ملتے تھے،پھر جب پاکستان اے ٹیم میں آیا تو پوچھا گیا کہ آپ کو کون سا نمبر چاہیے؟ اس وقت مجھے 39نمبر کا آپشن دیا گیا اور میں نے یہ نمبر اس لئے لیا کیونکہ جب میں پاکستان نیوی میں گیا تو اس وقت میرے کمرے کا نمبر بھی 39تھا۔

شاداب خان

آل راؤنڈر شاداب خان نے بتایا کہ پہلے ان کا شرٹ نمبر 29 تھا لیکن اب انہوں نے 7 نمبر منتخب کیا ہے کیوں کہ یہ نمبر انہیں پسند ہے اور ان کی بیٹنگ پوزیشن بھی یہی ہے، شاداب کے مطابق پہلے محمد سمیع یہ نمبر پہن کر کھیلتے تھے اور اب انہیں مل گیا ہے، 7 نمبر ملنے پر خوش ہوں۔

شعیب ملک

قومی ٹیم کے مایہ ناز آل راؤنڈر شعیب ملک نے بتایا کہ ان کا شرٹ نمبر 18 ہے اور اس کے پیچھے کوئی خاص کہانی نہیں ہے ، شروع ہی سے انہیں یہ نمبر ملا ایک دو بار تبدیل ہوا لیکن اب 18 نمبر ہی کے ساتھ وہ کھیل رہے ہیں۔

آصف علی

حالیہ ٹی ٹوئنٹی ورلڈکپ میں مخالف ٹیموں پر اپنی دھاک بٹھانے والے پاور ہیٹر آصف علی نے بتایا کہ ان کا شرٹ نمبر 45 ہے جس کے پیچھے کوئی کہانی نہیں، پی سی بی نے دیا تھا اب اس کے ساتھ ایک تعلق بن گیا ہے، آٹوگراف کے پیچھے 45 ضرور لکھتا ہوں۔

حارث رؤف

حارث رؤف نے 150 نمبر کے پیھچے کہانی کے راز سے پردہ اٹھاتے ہوئے کہا کہ جب میں پلیئرز ڈیویلمپنٹ پروگرام(پی ڈی پی ) کے تحت سلیکٹ ہوا تھا تو اس وقت میں نے 150 کلومیٹر فی گھنٹہ کی رفتار سے گیند کروائی تھی جس کی وجہ سے میں سلیکٹ ہوا تھا، زیادہ تر لڑکے مجھے 150 ہی کہتے ہیں۔

فاسٹ بولر حارث رؤف نے بتایا کہ پی سی بی نے انہیں 97 نمبر دیا ہے لیکن انہوں نے 150 نمبر کی درخواست کی تھی کیوں کہ پی ایس ایل میں بھی میرا نمبر 150 ہے۔

Comments

- Advertisement -