ماسکو: ترک صدر رجب طیب اردوگان سرکاری دورے پر روس پہنچ گئے، شامی صورت حال پر گفتگو ہوگی۔
تفصیلات کے مطابق ترک صدر رجب طیب اردوگان روسی دارالحکومت ماسکو پہنچ گئے، ہم منصب ولادی میرپیوٹن سے اہم ملاقات ہوگی اور شام کی صورت حال پر تبادلہ خیال کیا جائے گا۔
غیر ملکی خبر رساں ادارے کا کہنا ہے کہ دونوں ممالک کے صدور شام میں امریکی فوج کی موجودگی پر بھی گفتگو کریں گے، ترکی اور روس کے درمیان مضبوط تعلقات پر زور دیا جائے گا۔
اردوگان اور پیوٹن شام میں امریکی افواج کی موجودگی کے مخالف ہیں اور اسے شامی مسئلے کے حل کی راہ میں رکاوٹ قرار دیتے ہیں۔
دونوں ممالک کی طرف سے شام سے امریکی افواج نکالنے کے امریکی صدر ڈونلڈ ٹرمپ کے فیصلے کا خیر مقدم کیا گیا تھا۔تاہم شام سے امریکی فوج کا انخلا عمل میں نہیں لایا گیا۔
شام کی صورت حال، ترکی اور روسی صدور کے درمیان اہم ملاقات متوقع
شامی خانہ جنگی کے دو اہم فریق ان ممالک کے صدور نے حال ہی میں جی ٹوئنٹی اجلاس کے حاشیے میں ملاقات کی تھی۔
دوسری جانب امریکا کے قومی سلامتی کے مشیر جان بولٹن نے شامی حکومت کو خبردار کیا تھا کہ وہ اپنے ملک سے امریکی فوجیوں کے انخلا کے بعد کیمیائی ہتھیاروں کے استعمال سے گریز کرے۔
یاد رہے کہ گذشتہ دنوں ان کا کہنا تھا کہ اگر شام میں کیمیائی ہتھیاروں کا استعمال کیا جاتا ہے تو جس طرح ہم پہلے دو مرتبہ سخت ردعمل کا اظہار کرچکے ہیں تو ایک بار پھر ایسا ہی کریں گے۔
