کراچی: پاکستان انٹرنیشنل ایئرلائن (پی آئی اے) کے گرکر تباہ ہونے والے طیارے کا ایک ’پَر‘ ایئرپورٹ منتقل کردیا گیا جبکہ دوسرے پر کو نکالنے کا کام جاری ہے۔
تفصیلات کے مطابق بلڈنگ میں پھنسے دوسرے پر کو نکالنے کی کوشش جاری ہے۔ چھت سے انجن پاک فضائیہ کے ماہرین کی نگرانی میں اتارا جائے گا، تمام آپریشن چند گھنٹوں میں مکمل ہونے کے امکانات ہیں۔
ذرائع کا کہنا ہے کہ چند گھنٹے میں تباہ طیارے کے تمام ملبے کی ایئرپورٹ منتقلی متوقع ہے، طیارے کے ملبے کو پاک فضائیہ کے ٹریلرز کی مدد سے منتقل کیا جائے گا، حکمت عملی تیز کردی گئی۔
پی آئی اے طیارہ حادثہ، فرانسیسی ٹیم کی تحقیقات مکمل
دریں اثنا فرانسیسی اور پاکستانی حکام نے رن وے، کنٹرول اور اپروچ ٹاور کا بھی معائنہ کیا۔
دوسری جانب فرانسیسی ٹیم نے جمعۃ الوداع کے روز شہر قائد میں پیش آنے والے اندہناک طیارہ حادثے کی تحقیقات مکمل کرلی ہیں اس دوران یومیہ بنیاد پر گھنٹوں پر محیط تحقیق کے دوران روایتی طریقوں کے ساتھ فرانزک سمیت جدید تیکنیکی مہارتوں کا استعمال عمل میں لایا گیا۔
واضح رہے کہ 22 مئی جمعۃ الوداع کو لاہور سے کراچی آنے والا پی آئی اے کا طیارہ ایئرپورٹ کے قریب واقع ماڈل کالونی جناح گارڈن کی رہائشی آبادی پر گر کر تباہ ہوگیا تھا جس کے نتیجے میں 97 مسافر ہلاک جبکہ 2 مسافر معجزانہ طور پر بچ گئے تھے۔ حادثے میں مقامی لوگوں کی ہلاکتیں بھی ہوئیں جبکہ پانچ گھر مکمل تباہ ہوگئے۔
