کراچی کے علاقے کلفٹن سی ویو کے قریب گزشتہ روز پارکو کی لائن سے لیک ہونے والا تیل دراصل چوری کیا جارہا تھا، ملزمان کیخلاف مقدمہ درج کرلیا گیا ہے۔
پولیس نے واقعے کا مقدمہ سیکیورٹی آفیسرعزیز الرحمان کی مدعیت میں درخشاں تھانے میں نامعلوم ملزمان کے خلاف درج کرلیا گیا، جس میں چوری کی دفعات شامل کی گئی ہیں۔
اس حوالے سے پارکو ترجمان نے وضاحتی بیان جاری کیا ہے جس میں کہا گیا ہے کہ ساحل کے قریب پائپ لائن سے خام تیل کے اخراج کی نشاندہی ہوئی ہے۔ نامعلوم افراد کے ایک گروپ نے لائن سے تیل چوری کرنے کی کوشش کی۔
ترجمان کا کہنا ہے کہ اطلاع ملتے ہی علاقے کو سیل کرکے تیل کی ترسیل عارضی طور پر روک دی گئی تھی اور تقریباً 24 گھنٹے میں پائپ لائن آپریشن دوبارہ بحال کردیا گیا ہے، انہوں نے کہا کہ
قانون نافذ کرنے والے اداروں کی جانب سے واقعے کی مزید تحقیقات جاری ہیں۔
واضح رہے کہ کچھ روز قبل شاہ لطیف ٹاؤن میں بھی پارکو کی لائن کو لیک کرکے تیل چوری کیا جارہا تھا، واقعہ 15 مارچ رات 1 بجے کے قریب پیش آیا۔
پولیس نے بتایا کہ چوروں نے پائپ لائن پر لوہے کا کلپ لگایا ہوا تھا اور کلپ کے ساتھ ایک پائپ پریشر پائپ کے ساتھ جڑا ہوا پایا گیا جبکہ تیل چوری کرنے کے لئے پائپ سیوریج نالے کے اندر سے جارہا تھا، مینٹیننس ٹیم نے کلپ نکال کر سیفٹی کلپ لگاکر پائپ کو نکالا۔
ترجمان ڈی آئی جی ساؤتھ نے کہا ہے کہ ایس ایس پی ساؤتھ کو واقعہ کی مکمل انکوائری کرنے کے لیے خصوصی ٹیم تشکیل دینے کی ہدایت کی گئی ہے اور تیل چوری میں ملوث گینگ کو گرفتار کرنے کے احکامات جاری کردیے گئے ہیں۔
