واشنگٹن: امریکی صدر ڈونلڈ ٹرمپ کا کہنا ہے کہ شاید امریکا میں سب سے بڑی سرمایہ کاری سعودی عرب کی ہے، ہم دوطرفہ تعلقات اور معاملات سے الگ نہیں رہ سکتے۔
تفصیلات کے مطابق سعودی صحافی جمال خاشقجی کے قتل کے بعد امریکا اور سعودی عرب کے درمیان تعلقات میں تناؤ سامنے آیا تھا تاہم صدر ٹرمپ نے دونوں ملکوں کے تعلقات کو ناگزیر قرار دے دیا۔
امریکی صدر کا کہنا ہے کہ سعودی عرب امریکا سے کل 450 ارب ڈالر کا سامان خریدتا ہے، سعودی عرب امریکا میں کئی منصوبوں میں فنڈنگ کررہا ہے۔
ان کا کہنا تھا کہ سعودی عرب امریکا سے 110 ارب ڈالر کا فوجی سازو سامان خریدتا ہے، سعودی عرب 10 لاکھ سے زائد ملازمتیں بھی فراہم کررہا ہے۔
خیال رہے کہ گذشتہ دنوں سعودی صحافی جمال خاشقجی کو ترکی میں سعودی کونصل خانے میں قتل کردیا گیا تھا، بعد ازاں امریکی صدر نے اس واقعے کی شدید مذمت کی تھی۔
جمال خاشقجی کیس، سعودی وضاحت سے مطمئن نہیں، ٹرمپ
ٹرمپ نے جمال خاشقجیکے قتل سے متعلق سعودی وضاحت اور تحقیقات پر عدم اعتماد کا اظہار کرتے ہوئے کہا تھا کہ جب تک ہمیں جواب نہیں ملتا میں مطمئن نہیں ہوں۔
علاوہ ازیں امریکا نے سعودی سفارت خانے میں جمال خاشقجیکے مبینہ قتل پر ریاض میں منعقد ہونے والی سرمایہ کاری کانفرنس کے بائیکاٹ کا اعلان کیا تھا۔
غیر ملکی خبر رساں ادارے نے کہا تھا کہ امریکا کے وزیر خزانہ اسٹفین میوچن نے سماجی رابطے کی ویب سائٹ ٹویٹر پر لکھا تھا کہ امریکا سرمایہ کاری کانفرنس میں شرکت نہیں کرے گا۔
