لندن: امریکا کے بعد برطانیہ نے بھی سعودی صحافی جمال خاشقجی کے قاتلو ں پر سفری پابندی عائد کرنے کا اعلان کردیا۔
تفصیلات کے مطابق سعودی صحافی جمال خاشقجی کو ترکی میں بےدردی سے قتل کردیا گیا تھا، بعد ازاں امریکا نے قاتلوں کے ویزے منسوخ کرتے ہوئے امریکا میں داخلے پر پابندی عائد کی تھی۔
غیر ملکی خبر رساں ادارے کے مطابق برطانیہ نے سعودی صحافی جمال خاشقجی کے قتل میں مبینہ طور پر ملوث افراد پر سفری پابندیاں عائد کردی ہیں۔
برطانوی وزیر اعظم تھریسا مے نے زور دیتے ہوئے کہا ہے کہ صحافی کے قاتلوں کو برطانیہ میں داخلے کی کسی صورت اجازت نہ دی جائے، اور اس پر سختی سے عمل کیا جائے۔
برطانوی حکام نے قاتلوں کے ویزے بھی منسوخ کردیے ہیں۔
سعودی وضاحتیں جمال خاشقجی کے قتل کی بدترین پردہ پوشی ہے، ٹرمپ
علاوہ ازیں یورپی کونسل کے سربراہ ڈونلڈ ٹُسک نے ریاض حکام سے اس قتل کی مکمل وضاحت کا مطالبہ کیا ہے۔
خیال رہے کہ سعودی صحافی جمال خاشقجی کا ترکی میں سعودی کونصل میں قتل کیے جانے کے بعد امریکا نے گذشتہ روز قاتلوں کے ویزے منسوخ کرنے کا اعلان کیا تھا۔
یاد رہے کہ جمال خاشقجی دو اکتوبر کو استنبول میں واقع سعودی قونصل خانے گئے تھے جس کے بعد وہ لاپتہ ہوگئے تاہم سعودی حکام مسلسل امریکی شہری اور واشنگٹن پوسٹ سے منسلک 59 سالہ صحافی و کالم نگار کی گمشدگی کے متعلق غلط وضاحتیں دیتا رہا اور دو ہفتے تک حقائق کی پردہ پوشی کرتا رہا۔
