جنوبی کوریا میں چوروں نے تیل کی پائپ لائن تک پہنچنے کے لیے پورا ہوٹل کرائے پر لے لیا، لیکن عین اپنے منصوبے کی کامیابی کے قریب وہ پکڑے گئے۔
جنوبی کوریا کے چیونگجو نامی شہر میں 8 ملزمان نے ہوٹل کرائے پر لیا اور پورے ایک مہینے تک خفیہ سرنگ کھودتے رہے تاکہ قریبی تیل پائپ لائن تک رسائی حاصل کی جا سکے۔
ملزمان کو گرفتار کرلیا گیا ہے، کہا جا رہا ہے کہ یہ منصوبہ کوریا کی سرکاری تیل کمپنی کے ایک سابق ملازم نے بنایا تھا جسے تیل چرانے کے الزام میں برخاست کر دیا گیا تھا۔
میڈیا رپورٹ کے مطابق ملزمان نے ماہانہ 45 لاکھ وون پر ہوٹل کو کرائے پر حاصل کیا، ملزمان کھدائی کے لیے صرف کدال استعمال کر رہے تھے تاکہ کسی کو شور کی آواز نہ جائے۔
ایک مہینے میں ملزمان نے 10 میٹر گہری کھدائی کی تھی اور تیل پائپ لائن تک پہنچ گئے تھے۔
ابھی وہ اس کا جشن منا ہی رہے تھے کہ چھاپہ پڑ گیا اور سب کو گرفتار کرلیا گیا۔
