کراچی: شہرِ قائد کے علاقے گلبرگ میں انوکھی چوری کا واقعہ پیش آیا، چور گھر میں گھس کر مہنگا طوطا لے اڑا۔ سی سی ٹی وی فوٹیج اے آر وائی نیوز نے حاصل کر لی۔
تفصیلات کے مطابق کراچی کے علاقے گلبرگ میں چور نے گھر میں گھس کر سونے زیورات کی بجائے ایک مہنگا طوطا چرا لیا، سی سی ٹی وی کیمرے میں یہ منظر ریکارڈ ہو گیا۔
اے آر وائی نیوز کو حاصل ہونے والی سی سی ٹی وی فوٹیج میں چور کو گھر میں دیوار پھلانگ کر داخل ہوتے دیکھا جاسکتا ہے، چور نے صرف طوطا پکڑا اور واپس چلا گیا۔
چوری کی اس انوکھی واردات میں دو چور ملوث تھے، ایک چور گھر سے باہر رکشہ لیے کھڑا رہا، جب کہ دوسرے نے گھر میں گھس کر طوطا اٹھایا۔
سوئیڈن کے تاریخی گرجا گھر سے شاہی تاج چور لے اڑے
طوطا چرانے والے چور نے واردات اطمینان سے کی لیکن اسے خبر بھی نہ ہوئی اور سی سی ٹی وی کیمرے نے اس کی چوری کو ریکارڈ کر لیا، فوٹیج میں چور کا چہرہ بھی واضح نظر آتا ہے۔
چوری کیا جانے والا طوطا خاکی رنگ کا ہے اور اس کی مالیت 70 ہزار روپے بتائی جا رہی ہے، مالیت دیکھ کر اندازہ ہوتا ہے کہ چور نے قیمتی چیز ہی چرائی ہے۔
قرآن مجید کی کئی سورتیں تلاوت کرنے والا طوطا، ویڈیو مقبول
واضح رہے کہ کراچی میں اس سے قبل بھی طوطے اور دیگر قیمتی اور نایاب پرندوں کی چوری کی وارداتیں ہوتی رہی ہیں۔
