لندن : دنیا کی سب سے پرانی برطانوی ٹریول فرم تھوماس کک دیوالیہ ہوگئی ، جس کے بعد کمپنی نےاپنےتمام آپریشنزبندکردئیے ہیں۔
تفصیلات کے مطابق دنیا کی سب سے پرانی برطانوی ٹریول فرم تھوماس کک دیوالیہ ہوگئی، کمپنی کک کی انتظامیہ نے کہاکہ کمپنی کو خسارے سے نکالنے کے لیے جاری بات چیت کے ناکام ہونے کے بعد یہ فیصلہ کیا گیا، ساتھ ہی اس کمپنی کے چھ لاکھ سے زائد سیاحتی منصوبے بھی منسوخ کر دئیے گئے ۔
جس کے باعث برطانوی کمپنی کےہزاروں صارفین مشکلات کا شکار ہیں اور ڈیڑھ لاکھ برطانوی صارفین دنیا بھر میں پھنس گئے ہیں۔
برطانوی حکومت کا کہنا تھا کہ ان افراد کی واپسی ملکی تاریخ میں انخلا کا اب تک کا سب سے بڑا منصوبہ ہو گا جبکہ برطانوی شہری ہوابازی کی کمپنی نے بتایا کہ تھامس کک سے منسلک چار فضائی کمپنیوں کے جہازوں کو کھڑا کر دیا گیا ہے۔
تھوماس کک کمپنی کے سولہ ممالک میں آپریشنز جاری تھے، اس وقت بھی چھ لاکھ سیاح اور مسافر دنیا بھر میں اس کمپنی کے ذریعے سفر کر رہے ہیں۔
کمپنی کے دیوالیہ ہونے کی وجہ بین القوامی لینڈزر سے قرض پروگرام کے حصول میں ناکامی ہے، کمپنی ، ائیر لائنز، ہوٹلز اور ریزوٹس چلاتی تھی۔
کمپنی کے دیوالیہ ہونے کے باعث تقریبا بائیس ہزار افراد ملازمت سے فارغ ہوجائیں گے۔
