راولپنڈی : سکیورٹی فورسز نے پولیس لائن لورالائی میں دہشت گردی کی بڑی کارروائی ناکام بنادی اور بر وقت کارروائی سے تینوں خود کش حملہ آور مارے گئے جبکہ آپریشن میں ہیڈ کانسٹیبل اللہ نواز شہید اور 2 کانسٹیبل زخمی ہوئے۔
پاک فوج کے شعبہ تعلقات عامہ (آئی ایس پی آر) کے مطابق آج صبح 3 خودکش بمباروں نے لورالائی پولیس لائن پر حملے کی کوشش کی، تینوں خودکش حملہ آوروں کو پولیس نے داخلی چیک پوسٹ پر موثر طریقے سے چیک کیا، ایک خودکش حملہ آور داخلی دروازے پر ہی مارا گیا، جبکہ دیگر دو کو پولیس لائن کے اندر ہلاک کردیا گیا۔
آئی ایس پی آر کا کہنا ہے ایف سی اور کوئیک ریسپانس فورس فوری طور پر جائے وقوعہ پر پہنچیں اور علاقے کو گھیرے میں لے لیا، فائرنگ کے تبادلے میں ایک خودکش بمبار نے اپنے آپ کو اڑا دیا، جبکہ دوسرے خودکش بمبار کو سیکورٹی فورسز نے ہلاک کردیا۔
ترجمان کے مطابق دہشت گردوں سے فائرنگ کے تبادلے میں کانسٹیبل اللہ نواز شہید ہوگئے جبکہ 2 کانسٹیبل شدید زخمی ہوئے جبکہ سیکورٹی فورسز نے لورالائی پولیس لائن کمپاونڈ کو کلئیر قرار دے دیا ہے۔
مزید پڑھیں : لورالائی میں سیکیورٹی فورسز کی کارروائی، 2 خودکش بمباروں سمیت 4 دہشت گرد ہلاک
یاد رہے رواں سال مارچ میں بھی آپریشن ردالفساد کے تحت صوبہ بلوچستان کے علاقے لورالائی میں سیکیورٹی فورسز نے خفیہ معلومات پر آپریشن کیا تھا ، جس میں 2 خودکش بمباروں سمیت 4 دہشت گرد ہلاک ہوگئے تھے۔
آئی ایس پی آر کے مطابق کارروائی میں بلوچستان میں حالیہ دہشت گردی کا ماسٹر مائنڈ بھی ہلاک ہوگیا، ہلاک ماسٹر مائنڈ کا تعلق کالعدم تحریک طالبان پاکستان سے تھا۔
آئی ایس پی آر کا کہنا تھا کہ دہشت گرد زیارت میں 6 لیویز اہلکاروں کو شہید کرنے میں ملوث تھے۔ ہلاک دہشت گردوں سے بھاری مقدار میں گولہ بارود بھی برآمد کیا گیا۔ آپریشن کے دوران 4 سیکیورٹی اہلکار بھی معمولی زخمی ہوئے۔
