کیلیفورنیا: امریکا میں ایک تھیٹر کے اندر فائرنگ سے 19 سالہ ٹک ٹاک اسٹار ہلاک ہو گیا۔
تفصیلات کے مطابق امریکی ریاست کیلیفورنیا کے شہر کرونا کے ایک فلم تھیٹر میں فائرنگ کی زد میں آکر جواں سال ٹک ٹاکر انتھونی براجس اپنی دوست 18 سالہ ریلی گڈرچ کے ساتھ ہلاک ہو گیا۔
غیر ملکی میڈیا رپورٹس کے مطابق پیر کو ٹک ٹاک اسٹار اپنی دوست کے ساتھ فلم فارایور پرج کا رات کا آخری شو دیکھ رہا تھا، جب دونوں کو سروں پر گولیاں مار کر قتل کیا گیا، انھیں تھیٹر کے ملازم نے خون میں لت پت پایا تھا۔
پولیس رپورٹ کے مطابق براجس کی دوست تو موقع ہی پر مر گئی تھی تاہم ٹک ٹاکر کو شدید زخمی حالت میں اسپتال منتقل کیا گیا جہاں اسے وینٹلیٹر پر رکھا گیا، تاہم وہ جاں بر نہ ہو سکا۔
فائرنگ کے واقعے پر تحقیقات سے متعلق پولیس نے بتایا کہ فائرنگ کا کوئی خاص مقصد تاحال سامنے نہیں آیا ہے، یہ ایک بلا اشتعال حملہ لگتا ہے۔ پولیس کی جانب سے جاری کی گئی پریس ریلیز میں ٹک ٹاک اسٹار کے دوستوں اور اہل خانہ سے تعزیت بھی کی گئی۔
انتھونی براجس نے انسٹاگرام پر جو آخری پوسٹ شیئر کی تھی اس کے کیپشن میں لکھا تھا کہ اپنی پریشانیوں کو گنتے ہوئے حاصل شدہ نعمتوں کو ہی بھول جانے سے بہتر ہے کہ اِنہیں گنا ہی نہ جائے۔
