کراچی: ٹک ٹاکر کنول آفتاب اور ذوالقرنین حیدر کے بعد ٹک ٹاک کی ایک اور معروف جوڑی مکرم مغل اور عاشی اعوان رشتہ ازدواج میں منسلک ہوگئے۔
مختصر ویڈیو شیئرنگ ایپ ٹک ٹاک پر دلکش ویڈیوز بنانے والی عاشی اعوان اور ان کے ساتھی ٹک ٹاکر مکرم مغل نے شادی کرلی، جس کی ویڈیوز اور تصاویر سوشل میڈیا پر وائرل ہوگئیں۔
ٹک ٹاکر مکرم مغل نے اپنے آفیشل انسٹاگرام اکاؤنٹ پر اپنی شادی کی دلکش تصاویر شیئر کیں۔
تصاویر میں دیکھا جاسکتا ہے کہ عاشی اعوان نے اپنی زندگی کے سب سے خاص موقع پر سرخ رنگ کا خوبصورت عروسی لباس زیب تن کیا جبکہ ان کے شوہر مکرم نے سفید شیروانی پہنی۔
مکرم مغل نے اہلیہ عاشی کے مہندی لگے ہاتھوں کی تصویر بھی انسٹاگرام پر شیئر کی۔
دوسری جانب عاشی اعوان نے اپنے انسٹاگرم اکاؤنٹ پر دلہن بنے اپنی تصویر شیئر کی جس میں انہوں نے گھونگھٹ ڈالا ہوا ہے اور دوپٹے پر ’مکرم کی دلہن‘ لکھا ہوا ہے۔
علاوہ ازیں عاشی اعوان اور ان کے شوہر مکرم مغل نے اپنے ٹک ٹاک اکاؤنٹس پر بھی اپنی شادی کی ویڈیوز شیئر کیں۔
ٹک ٹاک کی اس مقبول جوڑی کی شادی پر ان کے مداحوں کی جانب سے مبارک باد دینے کا سلسلہ جاری ہے۔
واضح رہے کہ گزشتہ دنوں ٹک ٹاک اسٹار کنول آفتاب اور ذوالقرنین حیدر رشتہ ازدواج میں منسلک ہوئے تھے۔