واشنگٹن: امریکی صدر ڈونلڈ ٹرمپ کا کہنا ہے کہ آج بارڈر سیکیورٹی اور حکومتی شٹ ڈاؤن سے متعلق بڑا اعلان کروں گا۔
تفصیلات کے مطابق امریکی تاریخ کے طویل ترین جزوی حکومتی شٹ ڈاؤن 28ویں روز میں داخل ہوگیا ہے، صدر ٹرمپ آج حکومتی شٹ ڈاؤن سے متعلق اہم اعلان کریں گے۔
غیر ملکی خبر رساں ادارے کا کہنا ہے کہ جنوبی سرحد پر دیوار کے معاملے پر ڈیموکریٹس اور ٹرمپ میں تنازع شدت اختیار کرگیا ہے۔
امریکی صدر نے دیوار کی تعمیر کے لیے 5.7بلین ڈالرز منظور کرنے کا مطالبہ کر رکھا ہے تاہم کانگریس میں ڈیموکریٹس نے دیوار کی فنڈنگ کی منظوری سے انکار کیا۔
صدرٹرمپ نے دیوار کے لیے فنڈز مختص کیے بغیر بجٹ پر دستخط سے انکار کردیا اور ملک آج حکومتی شٹ ڈاؤن کا شکار ہے، شٹ ڈاؤن کی وجہ سے 8لاکھ سرکاری ملازمین بغیر تنخواہ کام کرنے پر مجبور ہیں۔
امریکہ: حکومتی شٹ ڈاؤن بدترین شکل اختیار کرگیا، ڈیمو کریٹس نے ٹرمپ کا بائیکاٹ کردیا
شٹ ڈاؤن کے باعث ایک چوتھائی حکومتی امور متاثر ہوئے، قبل ازیں شٹ ڈاؤن کے خاتمے کے لیے ٹرمپ اور ڈیموکریٹس میں مذاکرات ہوئے تھے جو ناکام رہے۔
خیال رہے کہ امریکی صدر ڈونلڈ ٹرمپ کی ضد کے باعث امریکا میں حکومتی شٹ ڈاؤن تاریخ کی بد ترین شکل اختیار کرگیا ہے، دو روز قبل ڈیموکریٹس اراکین نے ٹرمپ کی دعوت کو مسترد کرتے ہوئے ملاقات کا بائیکاٹ کردیا تھا۔
