پاک افغان طورخم بارڈر پر آنے والی تجارتی گاڑیوں کے ڈرائیورز کے لئے ویزا لازمی قرار دے دیا گیا، اس سے پہلے ڈرائیورز صرف پاسپورٹ کے ساتھ پاکستان میں داخل ہوسکتے تھے۔
تفصیلات کے مطابق پاکستانی حکومت کی جانب سے طورخم بارڈر پر تجارتی گاڑیوں کے ڈرائیورز کے لئے ویزہ لازمی قرار دے دیا گیا، اس سے پہلے ڈرائیورز صرف پاسپورٹ کے ساتھ پاکستان میں داخل ہوسکتے تھے۔
حکومت پاکستان کی جانب سے اعلان کے بعد پاسپورٹ اور ویزہ کے ذریعے مسافر اور تجارتی قافلوں کو آمدورفت کی اجازت ہے، اس سلسلہ میں طورخم بارڈر پر قانونی طریقہ سے دو طرفہ آمدورفت کے لئے خصوصی اقدامات کئے جا رہے ہیں۔
طورخم بارڈر پر دونوں ممالک کے حکام نے گذشتہ دنوں ملاقات میں قانونی طور پر آمدورفت کے لئے سفری دستاویزات پر میٹنگ کی اور اس بات پر اتفاق کیا کہ دونوں ملکوں سے آمدورفت کے لئے پاسپورٹ اور ویزہ ہونے چاہئے۔
ان اہم اقدامات کا مقصد قانونی طور پر تجارت کو مستحکم کرنا ، سکیورٹی میں بہتری اور سمگلنگ کی روک تھام ہے۔
دونوں ممالک کی جانب سے قانونی دستاویزات کے اعلان کے بعد تاجر اور ٹرک ڈرائیورز نے ان اقدامات کا خیر مقدم کرتے ہوئے قرار دیا ہے کہ اس سے دونوں ملکوں کو بھی فائدہ ہو گا اور تاجروں کو بھی فائدہ ہو گا، ایسے اقدامات پر ہم بہت خوش ہیں۔
کسٹم انسپکٹرعالم زیب کے مطابق ویزہ ایمپلیمنٹیشن سٹم پوری دنیا میں قانون کے مطابق رائج ہے، یہاں پر ویزہ سٹم سے تاجروں اور عوام دونوں کو یکساں فائدہ ہے۔
انچارج ایف آئی اے انعام الحق نے کہا کہ حکومت پاکستان کی نئی ویزہ پالیسی سے باڈر سے آنے جانے والوں کا ریکارڈ رکھنا آسان ہو گا۔